SECTIONS
Monday, April 22, 2019
SUPERBALITA DAVAO

Roldan: Sakit ang ulo sa presidente

Nota Bene

MAGTULO na ka tuig ang administrasyon ni Presidente Rodrigo Duterte. Ubay-ubay ang kausaban sa atong palibot ilabi na sa hisgutanang kahusay ug kalinaw ug serbisyong sosyal ngadto sa kabus.

Makita sab nato ang resulta sa programang “build build build” ilabi na dinhi sa Mindanao nga kanunay naulahi sa maayuhon sa mga nanglabay'ng panahon.

Gitas-an niya ang suweldo sa mga kawani sa gobyerno ilabi na sa sakop sa kapulisan ug kasundalohan.

Una nahuman ang tuig 2018 gisaad ni Duterte nga patas-an ang suweldo sa mga magtutudlo aron dili na kini mag-sideline sa pagpamaligya og bisan unsang butang aron mabuhi.

Gilimpiyohan sa presidente ang Boracay, Manila de Bay, El Nido, ug posibleng sa ubang dapit nga adtoanan og turista. Gilimpyohan sab sa pangulo ang halos tanang ahensiya sa gobyerno sa kurapsiyon ug kadtong nagpaburot sa ilang bulsa.

Nalimpyohan sab ang dalan batok sa mga sangkot sa druga ug kriminalidad hasta kadtong mga nag-istambay nga walay gihimo sa ilang lugar.

“Golden age” pod daw karon sa relasyon sa Pilipinas ug Tsina.

Apan samtang nalipay kita niini, may mga butang nga sakit gihapon sa ulo sa presidente. Matud pa niya sa usa ka pakigpulong nga bisan unsaon niya'g trabaho aron monindot ang kinabuhi sa Pinoy daghan gihapong butang nga dili niya mausab.

Ingon pa niya nga ang iyang gobyerno mismo ang babag sa kausaban nga iyang gihandom. Iyang gisugid ang Bureau of Customs nga kanunay masangkot sa anomaliya. Gikan sa eskandalo sa semento hangtud sa pagpalusot sa iligal nga druga naila ang maong ahensiya.

Apan daghan pang ubang ahensiya nga naa gihapon ang kurapsiyon mao nga nagsakit ang ulo sa pangulo. Mao gani nga gusto niya nga dugangan ang iyang “emergency power” aron madali ang proseso sa tanan sama sa “bidding system” sa mga proyekto sa gobyerno, pagsulbad sa problema sa “right-of-way”, pagparehistro sa negosyo, kaso sa husgado, pagpangdakop sa kriminal, ug uban pa.

Di tinuod nga sayon ang pagtukod og negosyo sa Pilipinas kay hastang dugaya ang proseso. Nagsakit sab ang iyang ulo sa kaso sa pagpamomba sa lain-laing lugar sa Mindanao ug sa insurhensiya. Wala madayon ang hinabing pangkalinaw tali sa Communist Party of the Philippines-New People's Army nga nakigbisog sud sa 50 anyos busa padayon ang giyera sa kabanikanhan.

Bisan ang Kongreso ug Senado problema gihapon niya kay wala sila nagkasinabot sa agenda nga iyang gustong mahitabo ug ilang suportahan.

Problema gihapon ang kalisud ug walay trabaho ang Pinoy nga nagsalig sa agrikultura.

Nalipay na unta ta nga ibalik sa pangulo ang industriya sa puthaw ug ubang industrial projects apan mora'g kutob lang sa press release.

Busa halos kada bulan makadungog kita nga adunay giputbol si Duterte nga sakop sa iyang gabinete ug hataas nga posisyon sa gobyerno tungod sa anomaliya, kurapsiyon ug pag-abuso puwesto.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!