DUHA ka mga tawo ang nadakpan samtang usa ang naka-ikyas sa gipahigayon nga drug bust sa hiniusang puwersa sa kapulisan sa Davao Oriental diin mokabat og kapin P1 milyon ang kantidad sa shabu nga nakuha sa otoridad niadtong Sabado, Pebrero 9, sa Mati City.
Base sa report sa kapulisan, nailhan ang mga dinakpan nga sila Joven Malintad Evaristo, alyas Owen, ug Rodel Juanir Pedraya, samtang naka-ikyas ang usa ka alyas Genis.
Subay sa imbestigasyon, gipahigayon ang drug bust batok sa mga suspek sa Putok Centro, Barangay Tamisan.
Narekober gikan sa posisyon sa mga dinakpan ang mokabat 150 gramos sa gituohang shabu.
Giingon sa kapulisan nga dugay na nilang gipanid-an ang iligal nga kalihukan sa mga nahisgutan diin atol sa ilang transaksyon misugot ang mga suspek nga mobaligya og shabu.
Dihang gitunol na sa mga suspek ang shabu, gilayong silang giposasan apan ang usa kanila naka-ikyas.
Gipasakaan na og kaso ang mga dinakpan didto sa korte samtang ang nakasibat gipangita sa otoridad.