LILOAN, Southern Leyte -- Usa ka depasaheroan nga bus nalimbuwad sa highway sakop sa Barangay Himay-angan, Liloan, Southern Leyte.
Matod ni Police Senior Inspector Ryan Jill Merquita, nahitabo kini mga alas 12 sa udto, Sabado, Pebrero 9.
Dugang ni Merquita, daghan ang mga samdan sa disgrasya diin ang uban nga nagrabehan gipangdala sa tambalanan sa Sogod, Southern Leyte.
Ang bus adunay tatak nga RFV Tours nga magbiyahean sa Southern Leyte.
Base sa talaan sa Liloan Disaster Risk Reduction and Management Office (DRRMO), naa sa 50 ngadto sa 60 ang sakay sa bus.
Dunay mga nakaangkon og menor ug major injuries sa ilang lawas.
Dunay pito ka mga pasahero nga gidala sa Sogod Hospital nga medyo nagrabehan apan wa hinuon nakalas.
Matod sa kapulisan, nawad-an og preno ang bus hinungdan sa pagkalimbuwad niini.
Naangol usab sa aksidente ang laing motorista nga si Rogelio Sarausa, taga Libagon, usa ka kolektor.
Naa na karon sa kustodiya sa Liloan Police Station ang drayber nga si Eduardo Legaspi.
Wa pa hinuoy kaso nga gipasaka batok sa drayber. (JKDP)