ORMOC City, Leyte - Naghatag og cash donation ang mga pulis sa Eastern Visayas alang sa mga biktima sa pagpamomba didto sa Mindanao sa miaging buwan.
Ang maong lakang gisugdan sa Police Regional Office (PRO) 8 sa panguna ni Police Chief Superintendent Dionardo Carlos.
Ang maong lakang gihimo gilayon sa mga Police Stations lukop rehiyon sama sa Catbalogan PNP sa Samar, Maasin PNP sa Southern Leyte, Ormoc City, Leyte ug Biliran.
Matod sa kapulisan nga sila lang mismo ang nag amot amot kay di sila pwede mangayo o mag-solicit sa katawhan.
Gipadayag usab sa kapulisan nga gawas sa paggukod sa mga responsable sa duguong pagpamomba, makatabang usab sila sa gastuhan.
Wala hinuon gisulti sa kapulisan pila ang ilang target nga kantidad nga mahatag kay ang importante alang kanila nga duna silay mahatag nga cash donation sa mga biktima.
Sa miaging buwan, naputos sa kahadlok ang Mindanao ingon man lukop nasud gumikan sa pagbomba sa usa ka Cathedral sa Jolo.
Gisundan usab kini og pagbuto sa granada sa usa ka Mosque.
Kapin sa 20 ka tawo ang nakalas sa maong insidente ug daghan usab ang nangaangol.
Gisiguro karon sa Philippine National Police (PNP) ug Armed Forces of the Philippines (AFP) nga mapanubag ang mga responsable.
Nahitabo ang pagpamomba sa Jojo sa Sulu, Zamboanga City ug Maguindano, North Cotabato. (JKDP)