GIHAGIT sa abogado ni Nel Spencer Tiu, uyab ni anhing Ashley Abad, ang kapulisan sa pagkiha sa iyang kliyente ug sundon ang nalatid sa balaod.
Matod ni manlalaban Orlando Salatandre, hapit na mag usa ka buwan ang kamatayon ni Abad, apan wa gihapoy napasakang reklamo ang kapulisan batok ni Tiu.
Naa nay mga pamahayag sa media batok sa iyang kliyente, apan way nahitabo.
Kagahapon ang gitagal sa kapulisan nga adlaw sa pag-atubang ni Tiu kanila aron di sila mapugos sa pagkiha.
Si Salatandre lang ang nakig-atubang kang Cebu City Police Director Sr. Supt. Royina Garma.
Si Salatandre niingon nga pinaagi sa kiha, matubag sa iyang kliyente ang mga alegasyon.
Gipaneguro niya nga si Tiu di mogawas nasod ug way plano sa pagbuhat niini.
Matod ni Garma nga magpaabot na lang si Salatandre nga ipasaka ang kaso sa korte.
“Kasi may invitation na kami. It is the lawyer who responded. So we gave him a chance until today (Feb 11) to appear and you know to shed light on what happened. So, kung wala, we will just recommend for the issuance of the subpoena,” matod ni Garma.
Si Police Regional Office 7 Director Chief Supt. Debold Sinas nagkanayon nga di nila mapugos ang hinigugma nga mopakita sa kapulisan aron mopaubos sa imbestigasyon.
Apan iyang gipasabot nga ang tumong ug tuyo sa pagpatawag kanila aron masayran kinsa ang naghatag sa Ecstasy kang Ashley ug asa usab gikan ang maong drugas.
“Kon dili gihapon, mo file lang mi sa case sa iyaha, normal case. Mogawas ang warrant then dakpon na namo siya. Then the full force of the law will be implemented against them,” matod ni Sinas. (AYB & JKV sa SunStar Cebu)