SECTIONS
Monday, February 18, 2019
SUPERBALITA CEBU

Mga nakapiyansa ‘tinubdan’

DAKO ang pagtuo sa kapulisan sa Central Visayas nga ang supply sa Ecstasy sa Metro Cebu nagagikan sa mga nalambigit niini nga nakapyansa.

Matod ni Sr. Supt. Remus Medina, hepe sa Regional Intelligence Branch, nga aduna silay gipangsundan nga mga supplier nga nangadakpan na niadtong 2018 apan nakapyansa.

Iyang gipasabot nga ang kapulisan nipasaka og kasong way piyansa batok sa mga dinakpan.

Apan sa dihang napasaka na ang kaso sa korte, wa na silay hold niini ug ang korte na ang nitugot nga sila makapyansa alang sa temporaryong kagawasan.

“Dapat no bail itong kaso nila pero ang court ang nag decide na bigyan sila ng bail. Pero on going yung kaso nila, may hearing pa” matod ni Medina.

Kon basihan ang matrix nga gipagawas sa Superbalita Cebu ug SunStar Cebu Lunes, Pebreo 11, mahimong matawag nga dako na ang problema sa Ecstasy sa Sugbo, matod ni Medina.

Apan iyang gipasabot nga ang mga anak og adunahan lang ang makapalit sa Ecstasy kay mahal. Di usab mosaka ang supply kon way mga dagkong kalingawan sama sa Sinulog ug uban pang dagkong event.

CLUBS

Lakip na sa ilang hugot nga monitoring sa pagkakaron mao ang mga night clubs nga naa sa matrix nga didto ang pinalitay sa Ecstasy.

Nakig-alayon na si Medina sa Philippine Drug Enforcement Agency (PDEA) 7.

Aduna na silay kasabotan nga kinahanglan nga matag karon ug unya mobisita ang ilang mga ahente ug mosagol sa mga customer sa maong mga night club.

Dako ang posibilidad nga sa weekends nga adunay mga disco party mahitabo ang distribution sa Ecstasy.

NA-DISMISS

Samtang na-dismiss usab ang kaso nga gipasaka sa Guadalupe police station batok kang Nicole Allan Casiño human siya makuhai og Ecstasy sa usa ka buy bust.

Matod ni Sr. Insp. Dexter Basirgo, hepe sa Guadalupe Police Station, nga sa dihang gipaubos sa examination ang party drugs, nag negatibo kini sa chemical test sa Camp Crame.

Gipasabot ni Basirgo nga nalangay ang pagpa-examine sa party drugs hinungdan nga sa pag-abot sa kaulohan, hupas na.

Apan aduna pay nag-ung-ung nga kaso si Casiño sa korte ug magpadayon ang hearing sa sunod buwan.

LISOD SUMPUON

Tungod sa kadaghang mga tawo sa Metro Cebu, giangkon ni Gobernador Hilario Davide III nga dili hingpit malimpyo ang gidili nga drugas dinhi labi na anaa usab ang impluwensiya sa social media o internet.

Ang gobernador namahayag nga lisod ma-detect ang Ecstasy kay isagol kini sa ilimnon.

Si Davide, chairman sa Regional Peace and Order Council (RPOC) 7, niawhag sa mga awtoridad nga dili lang sa shabu mosentro sa kampanya batok gidili nga drugas kon dili hingusgan usab ang pagpugong sa pagkuyanap sa Ecstasy nga nikatap sa mga club ug hotels.

“Anha ipangbaligya, anha ang mga party sa mga dato even sa hotels. Katong dili kaayo dato, shabu ila,” dugang ni Davide.

Siya masaligon nga madakpan sa kapulisan ang mga nagpaluyo sa pagpakatap sa party drugs o Ecstasy sa Sugbo labi na aduna nay gihuptan nga matrix o lead ang Police Regional Office (PRO) 7 ug Philippine Drug Enforcement Agency (PDEA) sa mga supplier sa ecstasy.

Alang kang Provincial Board Member Earl Tidy Oyas, presidente sa Philippine sa Councilors League (PCL) Cebu province chapter ug ex officio sa Sangguniang Panlalawigan sa Sugbo, gawas sa shabu, angay usab hingusgan sa kapulisan ug PDEA 7 ang paggukod niadtong mga nagpakatap sa Ecstasy.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!