SECTIONS
Sunday, April 21, 2019
SUPERBALITA CEBU

Diputado: Kataw-anan nga raid

Cuentas claras

GIHAGIT ni Provincial Administrator Ae Damalerio si kanhi Cabinet Secretary Leoncio Evasco Jr. nga ipa-raid ang iyang balay sa JA Clarin Street sa Tagbilaran isip pagmatuod nga wala siyay gitagoan nga druga didto og dili tinuod nga drug protector siya.

Mao kini ang gihimo ni Damalerio isip tubag-hagit sa gisulti ni Evasco didto sa Hongkong kaniadtong Pebrero 5 nga naghitak lang gihapon ang ginadiling druga sa Bohol og way nahimo ang kagamhanang probinsiyal niini tungod kay mismo ang mga namunoan sa Bohol dunay kalabotan sa pagkatap sa ginadiling druga.

* * *

Apan taliwala sa hagit ni Damalerio nga ipa-raid ang iyang balay, misumbalik siya paghagit ni Evasco nga kon walay ebidensiya nga makuha kaniya hangtod Pebrero 28, iyang iugbok og balik ang flagpole nga giibot ni Evasco sa Maribojoc og iyang bitayon si Evasco niini.

Pagka-bug-at sa maong hagit.

* * *

Unsay tubag ni Evasco?

Misulti si Evasco nga ang raid sa panimalay ni Damalerio mahitabo bisan kanus-a. Mahimong mahitabo kini sa wala pa ang piniliay o kaha, human sa piniliay sanglit naapil man siya sa lista.

Midugang pa si Evasco nga ang hagit ni Damalerio dili lang kay hagit batok kaniya kondili hagit usab kini ni PRRD, sa PDEA og ingon man sa naghimo sa maong report.

Mao na, miklaro si Evasco kang Damalerio nga, huwata ang imong sentensiya.

Susmariosep.

* * *

Kahinumduman nga sa pagbisita ni kanhi PNP Chief Ronald “Bato” dela Rosa kaniadtong Lunes sa miaging semana, giklaro niini nga tinuod nga dunay lista sa drug matrix sa Bohol og dunay mga lokal nga mga politiko nga nahilambigit niini.

Apan wala ibutyag ni Bato kon kinsa gyod ang naapil sa maong lista.

Sanglit dayag na man kaayo nga adunay drug matrix sa Bohol, ang pangutana mao kini.

Naapil ba si Damalerio sa maong lista?

* * *

Duna pay dugang pangutana.

Kon pananglit naapil man si Damalerio sa maong lista, unsa man siya sa maong lista, drug peddler o drug coddler?

Ang drug peddler namaligya og druga samtang ang drug coddler wala magbaligya pero mohatag og proteksiyon sa madakpan sa kapolisan.

Maayo unta og klarohon kini aron masabtan sa katawhan ang tanan og maghatag pod og hustisya sa pangalan ni Damalerio.

* * *

Dili ikalimod nga naghitak pa gihapon ang ginadiling druga sa Bohol.

Halos kada adlaw na lang ang dakop nga gihimo sa kapolisan diin nag-anam og kadaghan ang gidaghanon sa druga nga nadakpan.

Ngano kaha nga sama sa way pagka-hurot ang druga sa Bohol?

Dis-a gikan ang maong mga ginadiling druga, gikan sa gawas sa Bohol o gihimo lang kini sud sa lalawigan sa Bohol?

Katuhoan ba ang gisulti sa kagamhanan nga walay kalibotan ang mga nagdumala sa lalawigan sa pagkatap sa ginadiling druga?

Dili ikatingala ngano nga ma-isyo gyod ang ginadiling druga.

Matod pa ni Bato, nahadlok siya nga kon dili molampos ang kagamhanan ni PRRD sa pagsumpo niini, hayan mamahimong dakong problema sa gobierno ang gitawag og narco-politics diin ang mga politiko na mismo ang nahilambigit sa pagkatap sa ginadiling druga.

* * *

Unsa kahay lintonganay niining hagit og balos-hagit ni Damalerio ug ni Evasco?

Aduna bay raid nga mahitabo?

Moresulta ba kini sa pagka-sumpo sa druga o dula-dula lang kini sa kampanya sanglit nagakaduol na man ang piniliay sa Mayo karong tuiga?

Buyno, kataw-anan ang hagit nga magpa-raid.

Ang ang og magpa-raid ka kon duna kay gitagoan, limpiyohan gyod na nimo daan sa dili pa ka magpa-raid, kana kon duna man ugaling.

Kataw-anan sab kay ang raid pakalit kana, dili kana ipahibalo.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!