GIHAGIT ni Vice Mayor Carlo Fortuna ang Mandaue City Police Office (MCPO) sa paghingalan sa mga pulitiko nga giingong drug protector o nagprotehir sa Parojinog Drug Group nga anaa nagbasehan sa maong siyudad.
Matod ni Fortuna nga makahatag kini og bati nga imahe sa dakbayan sa Mandaue hinungdan nga dili lang hinganlan kon dili imbestigahon ug pasakaan kini og kaso aron mapahamtangan sa tukmang silot kon kini mapamatud-an.
Gibutyag usab niya nga sukad pa 2018 sa wala pa ang barangay elections, aduna na silay nadunggan nga mga nikandidato o mga opisyal sa barangay nga nalambigit o nakig-abin sa pagprotehir sa ilegal nga grupo.
Kini maoy usa sa mga rason nga ilang gihatag ang intelligence fund sa City, alang sa pagtabang sa anti-illegal drug campaign sa kapulisan.
“Of course it creates a not so pleasant image if Mandaue is singled out, but we have heard also from other cities nga labelled also that some of the officials are protectors. It is like every part of Metro Cebu,” matod ni Fortuna.
“But the thing is that, to do the real service is not just to insinuate. What is important is to establish and then go after, not just name but really go after, file the charges, arrest them. Mao nay gihuwat sa mga tawo, nga we will get big fishes ba,” dugang ni Fortuna.
Apan alang ni Mandaue City Police Office director Senior Supt. Julian Entoma nga dili usab sila makapagawas sa mga pangalan kay nagpadayon ang ilang gihimo nga beripikasyon.
Ilabi na nga human sa pagkamatay sa first councilor sa barangay Cubacub nga si Edgar Bihag niadtong Oktubre 2018. Si Bihag maoy unang gitudlo nga nahimong suod niadtong giila nga mga sakop sa Parojinog Drug group nga nakasud sa Barangay Cubacub niadtong 2018.
Ang duha nga sila si Mark Lester Castillo ug Renan Mabida kinsa giila nga mga pinangita sa mga pulis sa Ozamis City tungod kay mga sakop sa Parojinog syndicate, napatay usab niadtong Septiyembre 2018 sa Cubacub.
Matod ni Entoma nga padayon gihapon nga giingong “sightings” ang usa sa most wanted sa Ozamis nga si Marlon Parojinog. Dako ang ilang pagtuo nga anaa usab kini laing kontak nga maoy nag-protehir usab kanila, posibling lakip niini mga politiko.
“With that situation, ang grupo sa Parojinog definitely mikuha na sad sila og laing set sa politicians, so atong subayon kon naa pa ba with that info kon sighted pa ba si Marlon (Parojinog), nga nagtuyok-tuyok sa Metro Cebu. Pasabot naa pa gyud siyay mataguan, plus katong naay nakuha nga daku nga balor sa shabu, nahibaw-an man nato nga connected siya sa Parojinog group, kaya ato makita diha nga duna pa silay mga kontak kay ni-connect man gihapon sa Ozamis,” matod ni Entoma.
Dugang ni Entoma nga gimanduan na niya ang mga hepe sa kada estasyon sa MCPO nga makig-alayon sa mga barangay opisyal, alang sa himuon nga census kon kinsang mga balay ang gipaabangan o gipangbaligya ngadto kang kinsa nga mga tawo.
Lakip niini ang mga subdivision ug mga condominium unit nga maoy gitan-aw nga posibleng gihimo nga bodega kon taguanan sa shabu.
Usa ka balay sa subdivision diha sa Barangay Casili, dakbayan sa Mandaue, sikbit ra usab nga barangay sa Cubacub, ang nakuhaan niadtong Pebrero 8 sa gabii og mga kinilo nga shabu nga mobalor og dul-an sa P48 milyones.
Daan na usab nga niawhag si ABC president, Subangdaku Kapitan Ernie Manatad, nga angay lang moagi sa hustong pagsusi ang seryuso nga alegasyon ngadto sa mga opisyal sa syudad.
Sa text message ni Manatad sa Superbalita Cebu, nipadayag usab sila nga mga kapitan og kaandam nga makig-alayon sa kapulisan.