MADASIGON nga midawat sa pasidungog ang pipila ka personahe sa Davao City Police Office (DCPO) ug mismong ang director niini nga si Senior Superintendent Alexander Tagum.
Atol sa kulminasyon sa Basic Orientation on Traffic Laws, gihatagan og pasidungog ang pipila ka mga pulis nga mipailawom sa usa ka seminar.
Human gidawat sa DCPO niadtong Pebrero 4, 2019 ang mga Kawasaki Versys 650CC motorcycle gikan sa lokal nga panggamhanan sa Davao City, gilayon sab nga mihimo'g kulminasyon ang DCPO sa Domingo E. Leonor Headquarters.
Mokabat 183 participants ang gibansay nga naggikan sa Traffic Group ug ang tanang Traffic investigators sa dose ka mga police stations sa DCPO, City Mobile Force Company ug Mobile Police Group, diin ang taga Land Transportation Office (LTO) ang mihimo niini atol sa launching sa “Campaign Plan against Unsafe Driving” sa DCPO Ground.
Gibansay sila sa hustong paggamit sa breath analyzer nga maoy gamiton sa pag-determina kung langgo ba sa ilimnong makahubog ang usa ka motorista.
Di lamang sa pag-determina sa mga naka-inom nga drayber ang maong kampanya apan lakip na niini ang pagpakusog sa pagsikop sa mga motorista nga wa naka-helmet.
Usa sa mga halandong bisita ug mamumulong nga maoy naghatag sa pasidungog mao si Maj. Gen. Benito de Leon, ang head sa Public Safety and Security Command Center (PSSCC) sa Davao City.
Anaa sab sa maong programa sila LTO-11 Assistant director Niel Cañedo; Operation Officer Eleanor Calderon, DCPO command staffs, tanang station commanders ug mga bisita gikan sa mga nagkadaiyang sektor.
Ang highlight sa nasampit nga launching mao ang pinning sa “No to Kotong Badge” ngadto sa tanang police officers nga mitambong sa programa.
Mapasigarbuhon sab ang DCPO personnels sa pag-hashtag nga #notounsafedriving #notokutong #davaolifeishere.