Dura: Ang kamatuoran sa KAPA

NIADTONG Lunes, naaghat ko pag-interview sa among programa sa radyo sa atong kauban sa media nga si Dr. Arvin “Jun Blanco” Malasa nga taga Digos City aron pakisayran sa kamatuoran sa KAPA Community International, Inc.

Kining maong pundok di na bag-o alang nako tungod kay sikat kini sa among lugar human gipasirhan ilang opisina sa lokal nga kagamhanan sa Bislig City.

Suma ni Malasa, gipasirhan ang KAPA tungod sa politika kay ilang founder nga si Pastor Joel Apolinario, kinsa announcer sa radyo didto, dumadapig sa kontra sa mayor.

Tungod niini, milalin ang ilang pastor sa Alabel, Sarangani Province diin gipadayon ang iyang ministriya.

Sa miaging tuig, nagpagawas na og advisory ang Securities and Exchange Commission (SEC) sa publiko nga di mo-invest sanglit non-profit ug non-stock ang maong grupo. Buot ipasabot, di sila mahimong mangolekta og investment sa mga miyembro bugti sa 30 porsyento nga interes.

Gipasabot ni Malasa nga sayop ang giingon nga investment sanglit donation ang ilang gikolekta sa mga miyembro. Busa, walay makapugong kanila sa pagdawat niini.

Ang mga donasyon, suma pa, gigamit nga puhonan sa negusyo sama sa mga barko nga panagatan, ug uban pa.

Apan, tungod kay maayo ang tinguha sa ilang founder, gibahinan ang ilang mga miyembro sa kita sa ilang mga negusyo.

Dihang akong gipangutana kang kinsa nakapangalan ang mga negusyo, giingon nga nakapangalan sa lahi nga entity o pamilya sa ilang founder.

Sa laktod, di makaangkon ang si bisan kinsa nga miyembro sa ministriya nga usa sila sa mga tag-iya sa maong mga negusyo.

Ug sa ngalan nga donasyon, di kini mabawi bisan asa pa mag-abot, sanglit di man kini investment. Kon duna may nabalik sa mga miyembro, kini tungod kay matinud-anon ang ilang pangulo, apan wa sab sila masayud kanus-a kini kutob.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph