MAGUINDANAO PROVINCE -- Mialma ang Armed Forces of the Philippines (AFP) sa alegasyon ni Cotabato City Mayor Cynthia Sayadi nga nakigkunsabo ang militar sa Moro Islamic Liberation Front (MILF) aron maseguro ang kadaugan sa Bangsamoro Organic Law sa dakbayan.
Matud ni 6th Infantry Division chief Major General Cirilito Sobejana nga limpyo ang iyang konsensiya ug kahibalo sila nga walay gidapigan ang militar.
Gihimo lamang sa kasundalohan ang ilang misyon aron protektahan ang publiko batok sa kalaban sa estado.
Nasubo ang opisyal nga bisan pa nga gituman sa mga sundalo ang ilang trabaho sa eleksiyon gi-akusahan pa gihapon sila sa pagpanglimbong.
Gihagit sa militar si Mayor Sayadi nga pamatud-an ang iyang alegasyon ug magpakita og mga ebidensiya.
Nagpasalig sab si Sobejana nga magpabilin sila nga propesyonal, non-partisan ug magmatinud-anon sa ilang mandato nga protektahan ang mga sibilyan sa ilang political rights. (Edgar E. Fuerzas)