GISUBAY pa sa kapulisan sa Sta. Ana Police Station kung unsa ka seryuso sa iyang gipanulti kining usa ka edaran kinsa nasikop human nakuhaan og armas, kutsilyo ug mga bala.
Balhog sa Sta. Ana PNP ang usa ka senior citizen nga si Bamba (bansagon gitago), 90, nitibo nga taga Tamparan, Lanao del Sur.
Sa imbestigasyon sa kapulisan, nasayran nga alas 5:45 sa hapon niadtong Lunes, Pebrero 11, ang suspek gisikop human nakapkapan ni Pvt. Justine Ray Tayag kinsa sakop sa Task Force Davao didto sa sulod sa Office of the Special Assistant to the President (OSAP) nga nahimutang sa Chavez Street, Barangay 29-C, Poblacion, Davao City.
Nakurat si Tayag dihang paghiling sa bag sa edaran anaa ang usa ka .45 kalibre nga pusil, usa ka magazine, 11 ka mga buhing bala, duha ka kutsilyo ug usa ka gunting.
Sumala sa edaran nga tumong niya sa maong buhatan aron iyang pangitaon si President Rodrigo Duterte, aron iya suma pa nga patyon.
Tungod niini, gibalhog ang maong suspek sa Sta. Ana PNP samtang mag-atubang og tulo ka mga kaso sa pagsupak sa RA 10591 kun illegal possession of firearms and ammunition, illegal possession of deadly weapon ug kalapasan sa Omnibus Election code kun Comelec gun ban.
Gisubay pa usab sa kapulisan kung unsa gayod ka seryuso ang maong dinakpan sa iyang mga gipamulong nga iyang patyon si Pangulong Duterte.