ALANG ni Mandaue City Vice Mayor Carlo Fortuna nga human ginganlan ni Police Regional Office (PRO-7) director Gen.
Debold Sinas nga usa ang Liv Super Club sa mga party clubs sa Sugbo nga gi-monitor, tungod sa giingon nga diha mahitabo ang distribusyon sa ecstasy, kinahanglan kining sirhan.
Ang Liv Super Club ang nahimutang diha sa may North Reclamation Area sa barangay Tipolo, Mandaue City.
Angay lang nga mas pahugtan sa awtoridad sa kapulisan ug sa mga sakop sa Philippine Drug Enforcement Agency kon PDEA ang monitoring sa maong lugar.
Alang usab ni Mandaue City Police Office director, Senior Supt. Julian Entoma nga i-rekomendar niya ngadto sa kagamhanan sa dakbayan sa Mandaue, nga angay lang nga dili na i-renew ang business permit sa Liv Super Club aron kini hingpit na nga masirad-an.
Matud ni Entoma nga maglisud na sila sa mga pulis sa himuon nila nga monitoring sa lugar, human nga sila mga pulis ang gidid- an nga makasud sa lugar, ug bisan dili mag-uniform nga mga operatiba ang gibantayan na usab sa nagdumala sa club.
Dugang sa director sa MCPO, nga nasuta na nga diha kasagaran mahitabo ang transaction gani ang nanag-iya niini nga si Kenneth Dong ang nasikop sa National Bureau of Investigation niadtong Pebrero 4 ning tuiga sa kauluhan.
Si Dong usab ang nalakip sa party drug chain o sa pag-suplay sa ecstasy sa Sugbo, nga anaa sa matrix sa PRO7.
“Ako, to be frank to you, sa among level, nganong’ ato pa man na nga padayunon? Sa akong level, mo-recommend ko nga dili na ipa-renew ang ilang business permit, kay sa moingon ta nga i-tight ang monitoring, ipasulod atong mga operatives diha.
Kami mga pulis gibawalan mi diha, dili na gyud mi basta-basta makasulod lang. Maski na operatives, kay at times, mopugos og su’d murag mahug na hinuon nga protector ang mga pulis nga mosud diha. Atong nakita nga isa gyud na sa source ug ang owner diha connected sa drugas. Angay na gyud siya nga masirad-an,” pagpasabot ni Entoma ngadto sa Superbalita Cebu.