GIBAKWI sa kapulisan sa Mandaue City Police Office (MCPO) ang ilang rekomendasyon ngadto sa Commission of Election nga iisa ang alert level status diha sa syudad sa Mandaue, gikan sa Yellow status ngadto unta sa Orange alert level.
Kini gihimo ni MCPO Director Senior Supt. Julian Entoma, atol sa gipahigayon nga tibuok adlaw nga panagtigum sa Regional Joint Security Control Center kagahapon, Martes, Pebrero 12.
Human matud ni Entoma nga nitunga atol sa gihimo nga Peace Covenant pledge and signing niadtong Pebrero 4 sa MCPO grounds, ang tanang mga kandidato sa duha ka kampo nga maoy mag-tigi karong Mayo nga piniliay.
Dugang ni Entoma nga tungod sa pagbinayluay og nagkalain-laing nga isyud sa duha ka kampo, mao gihulagway kaniadto nga init ang pamolitika, tali sa kampo ni incumbent mayor Luigi Quisumbing ug sa kampo sa moatbang kaniya nga si Cong. Jonas Cortes.
Ila usab nasiguro karon nga wala sa duha ka grupo ang nalambigit usab sa Parojinog drug syndicate, o sa bisan unsa nga privat o political armed group (PAGs).
Apan kon atol o sa di pa ang campaign period nga amgsugod sa Marso 29, adunay motumaw nga kagubot nga maglambigit sa PAGS, hayan nga mi-rekomendar na usab sila sa pagpataas sa alert level sa election watchlist areas.
“I recommend nga i-downgrade ko yung recommendation ko, from orange to yellow, tungod kay niapil sila tanan sa Peace Covenant. Definitely nga usa na sa ato gitan-aw nga dili gyud sila moabot sa paggamit og PAGs, dili man sad nato ma-link ang presence sa armed group sa mga Kuaratong or Ozamis group sa ani nga mga set of candidates, kaya with the Peace covenant signing sa atong mga kandidato, ipabilin lang sa nato og yellow,” pagpasabot ni Entoma.
Kahinumduman nga niadtong’ Enero ning tuiga, ni-rekomendar ang MCPO sa comelec nga ipataas ang level sa ilang alert status sa Election Watchlist Areas kon EWAS.