SECTIONS
Tuesday, February 19, 2019
PAMPANGA

Garcia: Lugud: Makalabwad at Makadiwa (Love: Mundane and Spiritual)

Kapisik

E NA ku bisang manakit o makaramdam mu man

na'n ku pa ining inawa nung ginu ku ala ne man?

Nu'ka minta mal a sinta ku, Aring Tarik Bako Suliman?

Nanan ku pa ing bye kung ayni, sana e mu na ku lalakwan.

Nanan ke ing kislap ning bulan? Nanan ke ing aslag ning aldo?

Nung ala ka keni lele ku, misnang dalumdum ing bye ku.

King abak sumlag ya’ing aldo, mitakpan yang biga;

Kapupus ning gatpanapun – layun lumbug na ya...

E na kawangis ning lugud ku keka, alang wakas...kabud keka!

Ika mu ing ligaya ning bye, ning pusu kung keka alipan;

Isip, katawan ku at diwa, sablang keka yampang ku ngan!

Nung e na ka kaku mibalik, na'ng ulaga na niting labwad?

Aldo, bengi't sablang penandit, anti kung miyabtas kawad.

Anti kung miyabtas kawad. Anti kung miyabtas kawad!

~Miguel Serrano, “Tagulele nag Ligaya” 942000/11112005

Balang aldo miyayalilan, Sablang bage ka’kung paniglwan;

E mu sana kakalingwan...Pamikasundu, e na sana mibabayu.

E mu sana kakalingwan, Ika namu, ika’t aku namu sana – sana!

Sablang bage kekang tagkilan, Anting mala, miyayaslagan;

E mu sana susugatan...Panamdaman mu, e na sana mibabayu.

E mu sana papaburyan, Ita namu, ika’t aku namu...sana!

Nung ala ka keni ika mu rin ing pantunan.

Nung palitan mu ku, ika mu rin ing palsintan.

Sana ika ing palsintan, Sana ika ing makamal.

Sana ika ing palsintan, Sana ika ing makamal. Sana...sana!

Deting aldo lilipas la ngan, Ding penandit ka’kung paniglwan;

E mu sana gugulutan. Pamisanmetung, e na sana mibabayu .

E mu sana papaburyan, Ita namu, ika’t aku namu...sana!

~Miguel Serrano, “Sana Ika ing Makamal”

Dalit a meyangu king “Ing Babaing Mapamalit Sim” 2010

***

Adwa lang kauryan deng tuturing tamung pekamaulagang pamiyabe keti king yatu—ila pin ding makalabwad (mundane love) at makadiwang pamalsinta(spiritual love). Malagad lang tutu deng makaranas king mumuna dapot keraklan ing kadwa yang malilyari.

Ing makalabwad a pamalsinta mengari ya king pulut panilan king umpisa, dapot daig ne pa ing mapait a lasun king katatawalyan. Makananu? Mekad aranasan ta na ngan ing makanyan. Mumuna, asno kalagu o kasanting keng panakit tamu deng palsintan tamu. Asno kaganaka. Asno kalambing at asno kapakamal o kalugud kekatamu at ita mu man karela.

Kalabas ing mapilang aldo, bulan o banwa—manaliwa ing sabla—dirimla ing sadyang bubukal a sinta at maging bubukal o kakalukung kamwa o pamakikasaman uling miyayalilan sawa ing kanita gagad. Ing pakamalang sadya magi yang pekakasaman uling akikilala ne ning balang metung ing balang metung at nung sadya metung yang sula (precious gem) ing sinta ngeni miyalilan neng basura.

Daratang na ing pamipate-pate a pinalit keng pamisuyu-suyu, gulisakan kapalit ding mayumung sitsit (ning kaluguran da ka!), mipanagkas na la at e no mipangdiga. E no mipanupaya at bagya mung kabid mipagsisti la. E no mipamansing o agya mang mipaglalawe anti sadya. At miraras keng mipate na lang mataktak at mipamaryus na la pauli ning kamwa da king balang metung.

Antita ing miyayalilan pait ning atdu o lasun ing yumu ning pulut panilan. Dakal pin mipamate na la. Mipaglasun la o atin mu namang isumbung ne kareng kampun ning batas ing sadyang kapalsinta ba’yang makulung at e na ne akit pang pasibayu pauli ning m,ipalitang sinta king kamwa at pamakikasaman.

Ing sadyang singyumu ning pulut panilan kanita magi namung singpait ning lasun ngeni.

***

Dake Talabaldugan:

Gat – (panguri) Lakan. English – title of nobility, expression of recofnition of the greatness, prominence, or distinction of the person referred to, similar o “Don”. Alimbawa king pamangamit: “Dakal a gagalang at pupuri kang Gat Andres pauli ning keyang masiring pakamal king Indung Balen.”

gatâ – (palagyu) piga; sabo ning linamas a mekudkud a ungut, agta. English – coconut milk; also: plant juice or extract. Alimbawa king pamangamit: “Asna kanyaman palang panyangkap keng gandus ing gata ning ungut bang maglutung bibingkang tibag.”

gatang – (palagyu) takal. English – dry measure of 0.37 liter, usually for grains or starch products Alimbawa king pamangamit: “Maka-lima lang gatang a pale ding sese nang ayup Ikang king bala mung patingapun.”

gatas – (palagyu) mumunang pamangan da reng bayung bait a tau o kaladwan a aliwa. English – milk. Alimbawa king pamangamit: “Asno kaburi keng gatas deng bingut dapot karagul da kapatak man e da na buring inuman agyang makananung pilit karela.”

gatgát – (palagyu) gitgit, giting. English nick, groove, or mark on skin or bark produced by embedding rope, twine or wire. Alimbawa king pamangamit: “Atin yang ating gatgat bitis ing alipan ning Ginung Yalun inya sa’t minta ya king pipagaralan bang tambing nang mituknang iti.”

***

KAPAGMASUSYAN KAPAMPANGAN

Anti karing alus miyayaliwang bangsa, pigmasusyan da napun ing Aldo ring Pusu o Valentine’s Day inya sa’t asno kasli reng suklati at bulaklak a pamye ring malsinta karing palsintan da. Madalas mura mu ing kapalit uling kapanwalan da reng mamye, “Nung akwa me asbuk ing ninu man, akwa mu n’ya naman pusu. Ay, dungus mu, abe!

***

PAMIPALINO: Ing Kapisik magnasa ya at manwalang misubling pasibayu ing lagablab ning legwan ning Kalinangan Kapampangan kapamilatan ding keyang dalit, kawatasan, amlat at miyayaliwang kapaglalangan-panyulat a misulat king pigmulan at tune kulitan kambe ning dalise at mapagmasabal a pamisip at parasan.

Ing panyulat ding pipumpunan yang sukat mataluki at miparangalan kapamilatan ning pamangamit kareti at aliwa ring karing dayu at salungat a paralan dang dela keti Kapampangan. Ing Kapisik ala yang kikilingan a kapanaligan, aguman o ninu man nung e ing Lubusang Katutwan. Malyaring sumulat king garciakragi@yahoo.com para karing kutang o munikala.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!