KLARO kaayo nga gipaminaw ni Presidente Rodrigo Duterte ang reklamo sa pamilya sa namatay nga si Ashley Abad.
Gimando gud sa presidente nga dakpon si Nel Tiu, ang uyab ni Ashley nga giilang suspek na apil ang mga kauban.
Kini human nasuta sa autopsy result na-overdose sa party drug nga liquid ecstacy si Ashley.
Siyaro man sab ug di mahadlok ang mga kauban ni Nel aron mosulti sa tinuod nga mga panghitabo ug posebling mahimong saksi sa krimen?
Ang pagtingog sa presidente sa kaso ni Ashley angayan lang nga mahadlok ang mga nalambigit sa kaso?
Daghan na ra ba ang napatay sa kapulisan sa kampanya batok sa problema sa ilegal nga drugas kay giingong misukol.
Samtang si Atty. Orlando Salatandre, ang abogado ni Tiu, mipahimangno sa kapulisan nga sundon ang rule of law.
Dungan sa pasalig nga ania ra sa Pilipinas ang iyang kliyente ug way planong mosibat paingon sa gawas sa nasud.
Kita manghinaot nga wa sa plano sa kampo ni Tiu pinaagi sa iyang abogado ang pagguba unya sa pangan ni Ashley?
Kini kabalaka lang kay di na raba intawon maka depensa sa iyang kaugalingon ang biktima nga mipahuway na sa laing kalibotan.
Si Atty. Salatandre, usa sa mga abogado ni Mayor Ruben Ecleo sa Dinagat Island nga giakusahan nga maoy nagpatay sa iyang asawa nga si Alona Bacolod.
SA KASO NI RELUYA
Namatay si San Fernando town Cebu ABC President Nonoy Reluya kauban sa duha ka mga kauban sa nahitabong pagpang-ambush.
Samtang nakalingkawas ang iyang asawa nga si Mayor Ninet Reluya ug ang Laing duha sakay sa van.
Kon wa ko masayop wa man gud mogawas ang balita nga miluwat ug pamahag si Presidente Duterte.
Hinuon. si PNP Chief Oscar Albayalde nimando alang sa dinalian nga imbestigasyon sa naasoy nga kaso.
Apan mas bug-at man gud kon ang tingog sa presidente.
Unsa man kaha ang hinungdan nga hilom man ang presidente sa kasong pag-ambush sa magtiayong Reluya?
Email: efrenlonzon71@gmail.com Text: 09235562777