SECTIONS
Sunday, February 17, 2019
SUPERBALITA CEBU

Lariosa: Gugma ug ulag

Puyra buyag

ADLAW sa gugma ugma. Mogimok na ang mga dunggan ug mokusog pagpitik ang dughan. Bagtik nga molabyog-labyog ang pendulo sa kasingkasing sa manag-uyab.

Busa di katingad-an nga mapuno ang mga motel, di kagiswid ang bugnawng mga lawak sa hotel, mga cottages sa beach resorts hugpaan ug ingon man way kahilom ang mga tagbuanan.

Kini ang kahimtang sa kagabhion sa Valentine’s Day. Magkinagang sa hunghong ug mga parayeg nga motik-op sa kahilom aron mopuli ang hangos sa hangin.

Dinhi mapulog ang diwa sa kahinam sa katagbawan sa kamatuoran sa gugma nga mohatod nato sa pagpangutana unsa to, ehersisyo sa gugma o ulag?

Matod sa ni Webster, “love is a deep affection for someone” (ang gugma halawom nga pagbati ngadto sa usa ka tawo). Mao ni ang panagustohay sa manag-uyab.

Ingon pud siya “lust is a personal satisfaction of desire” ( ang ulag maoy pagtagbaw sa usa ka kahinam). Mao ni ang panaglambigit tungod sa sex.

Sa ato pa, kon atong sabton si Webster, maingon nga ang ulag maoy nagtukmod nganong mapuno ang mga motel, hotel ug cottages sa mga resorts.

Apan may usa ka bantugang phsycologist sa England nga nagsilbi kang Queen Elizabeth, nitambag nilang Prince Charles ug Princess Diana nga mag-sex kanunay aron di magbuwag.

Apan nagbuwag sila sa kadugayan nagpaabot nga wa tumana nila ang maong phsycologist. Sa atong panukidoki ang sex makalig-on sa attachment sa duha ka tawo.

Daghan ang matang sa gugma. Ang kang Kristo nga gugma espirituhanon nga mohangtod sa kahangturan. Love your neighbor, matod Niya. Gugma ni nga way sambog sa ulag.

Si Confucious ang pilosopo sa karaang Tsina nagkanayon nga ang gugma mohimo sa kaaway nga higala samtang si Luther King, Jr. sa Amerika niingon ang kasuko di kapatayg kasuko kondi gugma.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!