GIAPROBAHAN ‘in mass motion’ sa Konseho sa Lapu-Lapu City ang Five-Year Institutional Development Plan sa Lapu-Lapu City College sa tuyo nga makahatag og libreng tuition sa mga tinun-an.
Gipahibawo ni Dr. Eduardo Ompad, College President, nga ang maong dokumento usa sa gikinahanglan nga requirement sa CHED sa application aron nga mamahimong usa ka Higher Education Institution ang maong tunghaan.
Masaligon ang opisyal nga pasado ang ilang institusyon sa uban pang mga requirement nga gipangayo sama sa mga component naglakip sa instructors o faculty, library, staff, student’s affair and services, research & development, community extension & services, management & operation ug uban pa.
Sa higayon nga ka-aprobahan sa CHED ang maong aplikasyon kahatagan na og dakong kahigayonan ang mga Oponganon nga makatiwas sa pagtungha sa kolehiyo pinaagi unya sa libre nga matrikula.
“Minimal ra ang atong bayranan P100 per unit apan daghan ang dili makabayad,” tipik sa pamahayag ni Ompad.
Mokabat ngadto sa kapin sa P3,000 ang tuition sa usa ka semester sa LLCC apan gumikan sa kawad-on sa tinun-an, maglisod sila sa pagbayad sa maong kantidad.
Ang LLCC nagtanyag sa kursong: Bachelor of Elementary Education - General Education ug Early Childhood Education; Bachelor of Secondary Education – English ug Filipino; Bachelor of Hospitality Management -HRM ug Tourism; Bachelor of Science in Industrial Technology, Computer Technology ug Electronics Technology.
Kapin sa 2,000 ang migraduwar niini sukad sa 2010 (FVQ)