SECTIONS
Tuesday, February 19, 2019
SUPERBALITA CEBU

18 anyos nga call center agent patay sa dengue

IGO na lang sa pagmahay ug pagpadayag sa iyang kahingawa si Josephine Amoro taga Zone Imbao, Brgy. Kalawisan, dakbayan sa Lapu-Lapu, sa nadangatan sa iyang anak nga nakalas gumikan sa sakit nga dengue niadtong Enero 29.

Ang iyang anak nga si Claire Amoro, 18, usa ka call center agent sa Basak, Lapu-Lapu ang nahunosan sa iyang kinabuhi human nagkasakit og dengue.

Matod ni Josephine nga Enero 23 giingong gihilantan ang si Claire hinungdan nga iya kining gipa-check up sa usa ka pribadong ospital apan giingong trangkaso lang ang inisyal nga findings sa doctor niini hinungdan nga miuli ra usab sila dayon.

Sa pagduda nga posibleng dengue ang mitakboy sa iyang anak, iya na usab kini nga gipa CBC (Complete Blood Count) pagka ugma, Enero 24, ug didto masuta nga nios-os gayud ang platelet niini.

Apan bisan pa man niini, gipaubos lang una sa out-patient ni Josephine ang iyang anak sa pagtuo nga ma-monitor ra niya ang platelet niini matag karon ug unya pinaagi usab sa pagbisita sa tambalanan kada adlaw.

Apan human sa pipila ka adlaw nga kanunay magpa-CBC sa tambalanan giingong gi-regla si Claire hinungdan nga wala na kini mapaubos sa CBC.

Diha na siya makamatikod nianang pagka Enero 29 nga nagluya na kini ug nag bleeding na ang ilong ug baba hinungdan nga iya na lang unta kini nga dad-on sa tambalanan apan uwahi na ang tanan kay nakabsan gayud kini sa kinabuhi.

“Ug katong tungora nga na kuan pa to siya ato nga ubos na kaayo ang iyang (platelet) ako na ‘ta siyang i-admit unya wa man siya makuhae, kompiyansa lang pud ko kay kay nagtuo ko gidugo ra siya unya nidugo naman iyang ilong ug baba” saysay ni Josephine.

Wala na usab siya makahikutar pag-ayo niini samtang adunay gipamati sa lawas sanglit nag-atiman usab siya sa uban niyang mga gagmayng anak.

Giingong gikan usab nga na-dengue ang 10-anyos nga manghod ni Claire ug misunod usab dayon nga nataptan ug dengue ang laing niyang 13-anyos niyang anak.

Matod pa iya lang kining kanunay paimnon og tubig ug ingon man duga sa dahong kapayas nga nakapaayo sa mga anak niyang unang nataptapon og dengue.

“Murag nablangko sa gyud ko ato kay kapila gud to ato kada adlaw ko niadto ug doktor, katong gamay nagsige ug hilanat, kada adlaw ko magsige og lakaw-lakaw mao nablanko ko wala ko kahuna-huna unsay posibleng mabuhat,” matod ni Josephine.

Gilubong si Claire Amoro niadtong Sabado, Pebrero 9.

Ang barangay health worker sa Kalawisan nga si Gendil Bensi mibutyag nga nunot sa hitabo nagpahigayon gilayon ang barangay ug “misting” kun pag-spray gamit ang medisina sa dapit diin nanimuyo ang banayng Amoro aron masigurong mapatay ang mga lamok nga nagdala og dengue sa palibot.

Ila usab gipangkuha ang mga wala na gamitang mga ligid nga nagpunsisok haduol sa gipuy-an sa banayng Amoro sanglit mao kini ang posibleng gipuy-an ug gi-itlogan sa mga lamok.

Sa talaan sa barangay, moabot na sa upat ka mga kaso sa dengue ang natala sa pagsud sa tuig 2019 ug tulo niini mao ang mga kaso sa anak ni Josephine.

Pahimangno karon ni Bensi sa mga hilantan ug sobra sa tulo ka adlaw sa pagpahiling dayon sa mga doctor. (GCM)


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!