SUPERBALITA CEBU

San Fernando, Tuburan critical areas sa election

CRITICAL NGA MGA DAPIT: Sila si Police Regional Office (PRO) 7 Director Debold Sinas (wala) ug Central Command (Centcom) commander Lt. General Noel Clement mibutyag nga 14 ka mga dapit ang ilang giila nga critical areas sa Central Visayas tungod sa presensya sa armadong mga tawo. (Arnold Y. Bustamante)

ADUNAY 14 ka mga dapit sa Central Visayas nga giila nga critical nga nabutang sa red category ning nagsingabot nga election sa Mayo.

Ang mga dapit dunay mga rebeldeng New People’s Army (NPA) ug armadong grupo nga gipaluyohan sa mga pulitiko.

Duna say mga insidente nga may labot ang eleksyon.

Sa Negros Oriental, adunay pito ka mga lungsod ang naa sa red category.

Gisundan kini sa lalawigan sa Bohol nga adunay lima ug duha sa Sugbo nga naglangkob sa Tuburan ug San Fernando.

Sa miaging buwan, si San Fernando Mayor Lakambini “Neneth” Reluya gibanhigan.

Iyang bana ug duha ka mga staff nangamatay.

Matod ni Lt. General Noel Clement, Central Command (Centcom) commander, ilang butangan og daghang mga sundawo ang Negros tungod sa presensya sa mga rebelde.

“That’s why we will be deploying more AFP personnel there together with our PNP forces so that masiguro natin na dili nila ma-disrupt ang conduct sa elections didto,” matod ni Clement.

Dako og matabang sa kahusay ug kalinaw ang pagkooperar sa mga kandidato sa mga awtoridad aron di makasamot sa kagubot.

Dako usab og matabang sa kalinaw sa eleksyon ang gilusad nga mga peace covenant sa mga kandidato.

Ilang gipangsubay karon kining presensya sa mga armadong grupo nga naglihok sa rehiyon 7 kon kini iya ba sa mga pulitiko.

Kon masuta nga adunay mga kandidato nga nagpadagan sa mga armadong grupo, usa ni sa ilang hatagan og sulosyon, matod ni Clement.

Hugot usab ang ilang pagtinabangay sa kapulisan sa Central Visayas aron mahatagan usab nilag dugang pwersa kon magkuwang ang mga pulis.

Hayan mous-us

Gipasabot hinuon ni Police Regional Office (PRO) 7 Director Debold Sinas nga mahimong moubos ang gidaghanon sa red category nga dapit inig eleksyon na.

Atol sa pagsugod na sa kampanya sa mga magpapili sa national nga posisyon, giklaro ni Sinas nga mohatag silag security atol sa ilang himuon nga political rally.

Apan iyang gipasabot nga kon aduna may mohangyo kanila nga bantayan sila sa ilang pag suroy-suroy sa kabarangayan, di nila kini mahimo gawas kon adunay kamandoan sa Commission on Elections (Comelec).

“We have already issued directives na kining tanan nga kandidato nga moanhi diri nga nanginahanglan og security, amo nang i-assess. Pero mohatag mi sa area security for example naa silay proclamation rally, bisag kinsa pa sila, opposition o administration, unsa pa na i-secure gyud namo na,” matod ni Sinas.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph