UNOM ka mga tawo pasakaan na og kaso sa Special Investigation Task Group nga nag imbestigar sa pag-ambush kang San Fernando Mayor Lakambini “Neneth” Reluya.
Matod ni Cebu Provincial Police Director Sr. Supt. Manuel Abrugena nga ang ilang pasakaan og kasong multiple murder ug multiple frustrated murder ang unom ka mga personalidad.
Duha nga nailhan mao sila si Jerome Labitad ug Felix Abacajan Jr., kinsa positibong gitumbok nilang Mayor Reluya ug Giovanni Jojo Perez.
Sila si Labitad ug Abacajan nakaeskapo sa ronda sa kapulisan. Aduna pay laing upat ka John Do’s ang ilakip sa kaso nga wa pa nganli sa SITG.
Una nang gitug-an ni Chief Supt. Debold Sinas nga aduna nay inisyal nga resulta sa ballistic exam ug cross matching nga gihimo sa PNP Crime laboratory sa armas nga nakuha kang Labitad.
Gitandi kini sa mga ebedensya nga nakuha usab sa crime scene sa Reluya ambush. Giingong mitakdo kini.
Apan gibutyag ni Abrugena nga wa pa sila makadawat sa official nga resulta sa PNP Crime Laboratory.
Giandam sa SITG ang mga dokumento sa Regional Legal Service 7 samtang resulta sa cross matching ug ballistic exam makapalig-on pa sa kaso.
“Very hopeful po kami na itong nakuha naming result ay makakatulong doon sa pagsampa ng kaso against Labitad and Abacajan. It will strengthen yung pong case na ipa file against them,” matod ni Abrugena.
Gipasabot niya nga way panglimbong sa imbestigasyon sanglit ang PNP Crime Laboratory lahi nga unit sa PNP.
Iya kining gihulagway nga di maempluwensyahan sa laing unit. Gipahibawo na usab ni Chief Supt. Debold Sinas si PNP Chief Oscar Albayalde sa kalamboan sa kaso sa mga Reluya. Giingong nakontento ra usab kini. (AYB)