GIKUMPIRMA sa Department of Social Welfare and Development (DSWD)-Northern Mindanao nga gatusan ka mga benipisyaryo sa Pantawid Pamilyang Pilipino Program (4Ps) sa Cagayan de Oro ang mireklamo human napulitika sa niaging mga semana diha sa Misamis Oriental Integrated Sports Center (MOISC).
Kini ang gibutyag ni Oliver Inodeo kinsa tigpamaba sa 4Ps sa DSWD-Northern Mindanao sa interbyu sa SunStar SuperBalita.
Gibutyag niini nga nagtap ang usa ka Civil Society Organization (CSO) alang sa usa ka bible study sa mga benipisyaryo sa 4Ps apan ang nahitabo gipaila-ila ang slate sa partido sa PaDayon Pilipino sa Distrito 1 ug 2 sa Misamis Oriental.
Giingong naghatag og speech si Board Member Prexy Elipe isip hulip sa welcome address nga unta si Governor Yevgeny Vincente Emano maoy mohatag ug pipila ka mga kauban nga board member nihatag sab og speech ug pagpaila sa ilang mga kaugalingon usa dayon ang kalihukan nga bible study.
Butang nga dili gyod unta pwede kun tumong mao ang bible study.
Tungod niini nga kasupakan sa CSO gipatawag kini sa DSWD ug giwarningan nga dili kini pwede mahitabo og usab ug kun mautro gidid-an na silang maghupot ug mga bible study sa umaabot.
“Kalihukan ni siya sa Civil Society Organization ug ang ending nag endorse og politiko. It is not mean for bible study apan gigamit ang activity. Warning lang, bawal ang epal sa DSWD,” matud ni Inodeo.
Dili pangampanya
Si Sangguniang Panglungsod Board Member Prexy Elipe nga nainterbyu sa SunStar SuperBalita niingon nga dili pangampanya ang ilang gihimo niadtong bible study sa 4Ps.
Nagrespeto lamang sila niadto nga kalihukan labina nga anaa man sa programa ang pangalan ni Emano ug siya ang gitahasan niini nga maghatag og welcome address.
“Ang nahitabo man gud ako ang hulip nga maghatag og welcome address ug naa man koy kuyog nga pila ka mga board member naa man ilang presensya ako nalang pod gi-acknowledge isip pagpaila-ila,” pasabot ni Elipe.
Dugang niini nga walay intensyon niadto nga pangampanya tungod kay unang-una mga benipisyaryo sa 4Ps nga anaa didto nga pulos taga siyudad sa Cagayan de Oro ug sila nga anaa didto mga kandidato sa Misamis Oriental.
“Unang-una wala mi intensyon sa pagpamulitika kay ang mga benipisyaryo taga Cagayan de Oro, wala sila nakadungog nga among gikampanya silang Pompee La Vina o ba kaha si Dongkoy Emano,” matud ni Elipe.
Dugang niini nga gilauman na niya nga himuan kini og isyu labina kay padangaton ang eleksyon.
“Maguol ko kun walay isyu,” dugang ni Elipe.