MOKABAT sa 130 ka mga paresan sa dakbayan sa Mandaue ang benepisyaryo sa mass wedding nga pasiugdahan sa Mandaue City government karon.
Samtang, ang dunay transaksyon sa Mandaye City Hall ang makadawat og surpresa sa bisan asa nga opisina isip Valentines’ treat.
Ang Mandaue City ug Lapu-lapu City nangandam usab sa pagmitinar sa kahapsay ug kalinaw ug dunay idalit sa publiko nga mga pahalipay.
Ang kagamhanan sa Mandaue mopasiugda karon og libreng pagkasal sa 130 ka mga paresan kun mass wedding.
Alang kini sa mga manag-uyab nga taga Mandaue nga lima ka tuig pataas na nga nagpuyo, kay dili kakaya sa paggasto sa mga gikinahanglan alang sa usa ka kasal.
Himuon ang mass wedding sa Mandaue City |Sports complex sa alas 10:00 sa buntag, diin si Mayor Luigi Quisumbing ang mo-officiate.
Matud ni Atty. Danilo Almendras, Mandaue city administrator nga libre sa city hall ug sponsors, singsing, cake ug pagkaon.
PAG-IBIG WEDDING
Laing mass wedding usab ang himuon sa J. Centre mall, sa may dan A.S. Fortuna karon, Pebrero 14, sa alas 9:00 sa buntag, diin giandam kini sa ahensya sa gobyerno, Pag-ibig, isip nahimo na nga tinuig nga programa atol sa bulan sa Pebrero.
“Mas gihatagan gyud nato karon og gibug-aton ang matabangan kadtong’ mga pila na ka tuig nga nag-live in, kay maglisud lage diha sa mga galastuhan sa pagpakasal. Pagpakita ni sa bili, nga mahimong legal ang ilang pagpuyo, dili rani alang kanila nga couple, apan lakip na usab sa ilang mga anak,” pagpasabot ni Almendras.
Anaa usab ang nagkadaiyang Valentines decorations sa Mandaue City Hall, diin mahimo ka nga makapahulagway ang manag-uyab, pamilya, mga higala, solo ug uban pa.
Ang Valentines day di lang alang sa mga adunay pares, apan alang sa tanan, single o bag-ong gibuwagan o searching pa man.
Mao kini hinungdan nga adunay Vakentines treat nga idalit ang matag opisina diha sa Mandaue City hall.
Ug aron masiguro nga way makapakgang sa kalipay sa tanan ugma ang kapulisan nipaneguro ilabi na sa Lapu-lapu nga full alert sila.
Dili lang sa pagbantay sa mga motel, hotel ug uban pa nga susama nga establisemento apan ilabi na diha sa mga posibleng mopahigayon og mga kalihukan may labot sa kasaulugan, aron malikayan nga magamit kini nga lugar sa pagbaligya og mga ilegal nga drugas.