MAASIN City, Southern Leyte - Mga pulis sa rehiyon 8 gipaubos sa surprise random drug test alas 2 Biyernes sa hapon, Pebrero 8.
Si Maasin City Police Director Superintendent Mark Nalda nipasabot nga routine drug test lang ang gihimo.
Dugang ni Nalda, 25 porsyento sa ilang kinatibuk-ang pwersa ug 100 porsyento sa mga sakop sa City Drug Enforcement Unit gi-drug test.Wa pa hinuoy resulta.
Ang kamandoan hugot nga gipatuman sa kapulisan sa pagsiguro nga way mantsa sa ilegal nga drogas ang ilang mga sakop.
“Og dili pa drug test (ang pulis), despite sa order to do so, he or she will be administratively liable for insubordination,” matod ni Nalda.
Ang drug test di lang gihimo sa Philippine National Police, lakip na niini ang mga pampublikong opisina. Dugang ni Nalda nga kini nagpamatuod nga seryuso sila sa paglimpyo sa mga sakop nga dunay kalambigitan sa ilegal nga kalihukan.
Base sa Article 3, Section 36, paragraph “d” sa Republic Act 9165 o Comprehensive Dangerous Drugs Act of 2002, gimandoan ang tanan pampubliko ug pribadong buhatan sa pag- random drug test sa mga kawani.
Kini aron masiguro nga luwas sa ilegal nga drugas. Kon magpositibo, mahimo kining basehan sa pagsuspenso o pagtaktak sa trabaho. (JKDP)