CAN-AVID, Eastern Samar-Kanhi kapitan sa usa ka barangay nadakpan sa raid sa kapulisan alas 10, Huwebes sa buntag, Pebrero 7.
Giila ang suspek nga si Edwin Pomasin, 52, nagpuyo sa Barangay Carolina ning lungsod.
Matod sa kapulisan, taudtaud na gipanid-an si Pomasin.
Niini, miluwat og search warrant si Borongan City Regional Trial Court Branch 2, Judge Nathaniel Baldono sa kalapasan sa Republic Act 10591 o Comprehensive Firearms and Ammunition Law niadtong Miyerkules, Pebrero 6.
Giplano pag maayo sa kapulisan ang operasyon aron malikayan ang posibilidad nga magkapinusilay.
Ang joint operation gilangkuban sa kapulisan sa Can-avid pinangulohan ni Police Chief Inspector Alex Robin, Regional Special Operations Group- Eastern Visayas Police Senior Inspector Remegio Go, Provincial Drug Enforcement Group Police Senior Inspector Tyrone Mark Cartalla, ug Eastern Samar Mobile Force Company Police Senior Inspector Brigido Salisi.
Hapsay ra hinuon nga nasikop si Pomasin atol sa operasyon.
Nakuha gikan kaniya ang usa ka granada, usa ka kalibre .45 nga pistola, mga bala sa nagkalainlaing kalibre sa armas, silencer sa submachine gun, ug holster.
Lakip sa nakuha ang tulo ka pakete sa gituhoang shabu nga nagkantidad og P3,000 ug duna usay plastic nga dunay sud nga marijuana.
Gidala gilayon sa presinto si Pomasin, kinsa gipasakaan na og kasong kalapasan sa ilegal nga paghupot og armas ug paghupot og ilegal nga drugas. (JKDP)