GIBASURA sa Municipal Trial Court in Cities ( MTCC) Branch 7 ang kasong carnapping nga gisang-at sa Cebu City Government batok kang kanhi kapitan Joel Garganera.
Ang kaso gibasura gumikan sa kapakyas ni Ronald Malacora pagtunga sa mga hearing nga gidumala ni Judge Francisco Seville, Jr.
Si Garganera gipasakaan og kaso gumikan sa iyang kapakyas pag-uli sa pag-ulis sa sakyanan sa hustong panahon dihang nimando si kanhi acting Mayor Margarita Osmeña para ipahigayon ang imbentaryo niadtong 2016.
“The carnapping case filed against me was bound to be dismissed. There was no ground for such in the first place. It was just another tactic of the administration to impose fear upon the supporters of the opposition,” padayag ni Garganera.
Si Garganera niingon nga wa dayon niya mauli ang pick-up vehicle sanglit wa siya sa Pilipinas.
Ang iyang mga empleyado sa Barangay Tinago dili sab makauli sa sakyanan sanglit wa nila ang yawe.
Paglabay sa pipila ka adlaw human sa deadline nga gihatag sa acting mayor, iya nang giuli ang sakyanan uban sa laing mga kapitan nga opisyal sa ABC niadtong 2016.
Ang laing mga kapitan gipasakaan usab og kasong carnapping nga pending pa sa MTCC.
Matod pa ni Garganera, kinsa magpasubli, gipaagi ra sa inventory apan wa na giuli ang mga sakyanan ug ubang service vehicle sa barangay nga di kaalyado sa BOPK.
Iyang gihulagway nga daw naguba na ang iyang kanhi service vehicle nga giparada atubangan sa barangay hall sa Tejero kay giisyu kini ngadto ni kanhi kapitan Jessielou Cadungog.
Si Cadungog on-leave sa iyang pagkakonsehal sa barangay human sa giingong suway nga pag-ambush kaniya.
OSMEÑA NAKALUSOT
Gibasura sa Office of the Ombudsman Visayas ang kasong malversation ug graft batok ni Mayor Tomas Osmeña, mga konsehal, department head ug opisyal sa barangay Sambag I.
Nakita sa Ombudsman mga way igo nga basehan aron konbiktohon ang mga gipasanginlan human gitugyan ni Ailien Guardo, kinsa private person pa niadtong 2017, ang ambulansiya gikan sa Cebu City Government.
Ang kaso gipasaka ni Lemar Alcover, kinsa maoy barangay kapitan sa Sambag -I niadtong higayona, apan gipilde siya ni Guardo niadtong eleksyon sa barangay walo na ka buwan ang nakalabay.
“Finding no probable cause for violation of Article 217 of the Revised Penal Code and Section 3(e) of Republic Act No. 3019 as amended against the respondents,” tipik sa desisyon ni Deputy Ombudsman Paul Elmer Clemente.
Lakip sa gipasanginlan mao silang Osmeña, Konsehal Mary Ann delos Santos, Eugenio Gabuya Jr., Jerry Guardo ( bana ni Ailien), Ronald Malacora, kinsa maoy department head sa General Services Office, Nagiel Bañacia, pangulo sa City Disaster Office.
Si Guardo, kinsa konsehal sa Cebu City north district, nihangop sa desisyon sa Ombudsman.
Matod niya nga way pagturn-over sa acknowledgment receipt for equipment (ARE) nga nahitabo subay sa alegasyon ni Alcover.
Ang ambulansiya naka ARE ngadto kang Bañacia.
Ang pagtugyan ni Bañacia sa ekipo mao ang kustodiya ug safe keeping sa ambulansiya sanglit si Ailien gitudlo isip pangulo sa barangay disaster command center. (PAC)