MOPATUMAN og kapin P40 milyones nga proyekto ang dakbayan sa Sugbo para sa drainage system ug pagkongreto sa karsada sa unom ka lugar sa siyudad.
Si Konsehal Jerry Guardo, chairman sa committee on infrastructure, nagkanayon nga giaprobahan na sa konseho ang mga proyekto nga ipatuman sa Department of Engineering and Public Works (DEPW) ning tuiga.
Lakip sa mga infrastructure project nga tukoron mao ang silt trap o rubbish trap sa 14 ka barangay nga nahimutang sa urban areas balor og P4.42 milyones diin ang V.O. Chupuico Construction ang winning bidder.
Adunay construction sa concrete pavement nga adunay drainage system sa sityo Rotunda ug sityo Tayong sa barangay Banilad balor og P6.49 milyones kansang proyekto gi-award ngadto sa Tuanzon Construction.
Lain concreting sa Salinas drive paingon sa Sanson road sa barangay Lahug balor og P8.98 milyones nga gidaog sa Win Construction ug lain sab sa Barangay Camputhaw balor og P5.69 milyones nga pagadumalaon sa ARQ Builders.
Sementuhon usab ang dalan gikan sa sityo Kamagong paingon sa Parklane Hotel sa Barangay Lahug balor og P12.83 milyones nga trabahuon sa ARQ Builders ug laing pag-semento sa parking lot sa Warwick Barracks sa Ermita nga nagkantidad og P3.65 milyones diin ang E.V. Caballero Construction.
Si Guardo nagkanayon nga posibleng sa mosunod nga mga buwan ipatuman na ang maong mga proyekto human sa pag-isyu unya sa siyudad og notice to proceed diin iyang gipanglantawan nga mominos ang epekto sa baha sanglit wala na unyay mga plastik nga mabara sa drainage gumikan sa silt trap.
Nunot ning maong plano, gipaabot nga makasinati og kahuot sa trapiko ang nahisgotang dapit atol sa pagpatuman sa proyekto.
Gipaabot nga ang Cebu City Taffic Office (CCTO) mohimo sa tukmang plano sa paghan-ay sa dagan sa tapik. (PAC)