BANTAYAN sa Lapu-Lapu City Police Office (LLCPO) karong adlawa, Pebreo 14, ang mga gagmayng lodge ug motel sa dakbayan nga posibleng mapahimuslan sa mga ilegal nga kalihukan atol ning pagsaulog sa Adlaw sa Gugma.
Gihimong basehanan ni Senior Supt. Limuel Obon, direktor sa LLPO, ang pagkasikop sa pipila ka mga durugista sa dakbayan ug ubang kasikbit nga mga dapit nga sa gagmayng lodge ug motel ipahigayon ang mga transaksyon sa gidiling drugas gumikan sa kay mas hugot ang seguridad sa mga dagkong hotel ug resort.
Dili buot ang kapulisan nga modungan usab ang pagpamaligya ug gidiling drugas ning adlawa.
Gawas sa illegal nga druga, gikatakdang bantayan usab sa kapulisan ang mga posibleng pagpahimus sa mga menor de edad sa mga hamtong ug edad atol ning adlawa.
Nunot niini, giawhag na ni Obon ang mga kawani sa mga gagmayng lodge ug motel sa pagtaho dayon sa kapulisan sa presensya sa mga posibleng dautang elemento sa ilang mga establisimento aron dali usab kini nga masusi sa kapulisan.
“Question mark dayon na kung makakita sila ug young boy or girl nga naay kauban nga senior citizen or older guy ano so usually red mark na na then nag co-coordinate na na sila sa atoa,” matod ni Obon.
“It’s a challenge and dako atong paglaum nga with our meeting sa mga punong barangay and with their cooperation tabangan gyud mi pag-monitor niana,” dason ni Obon.
Dili ra hinuon problema sa kapulisan ang mga pag -monitor sa dagkong hotel ug resort sa dakbayan sanglit ang mga security officer niining maong mga estbalisimento adunay grupo nga gitawag ug Lapu-Lapu City Association of Hotels and Resorts (LACAHR) ug maoy gitahasan pag-abag sa kapulisan sa monitoring sa ilang mga tagsa-tagsa ka mga establisimento.
Apan pabutangan gayud ug pulis ang mga posibleng ipahigayong Valentines party sa mga resort ug ubang dagkong estbalisimento aron kalikayan ang posibleng presensya unya sa party drugs sama sa nahitabo sa usa sa mga concert sa milabayng Sinulog.
“Sa 2nd class nga hotels ug pension houses naa sad ta ana, we started coordinating with them kato naa ta’y dagkong mga events diri sa atoa and in fact naa gyud ta’y nadakpan ana nga with firearms nga didto ni-check in sa kanang mga ingon ana kay they know unsa ka strict ang ato mga star hotels,” dugang niya. (GCM)