BTA nag-andam na alang sa paghulip sa panggobyerno

MAGUINDANAO PROVINCE -- Gihulat na lamang sa Moro Islamic Liberation Front (MILF) nga mapirmahan ni Pangulong Rodrigo Duterte ang appointment documents aron makalihok na ang Bangsamoro Transition Authority (BTA) alang sa bag-ong Bangsamoro Autonomous Region in Muslim Mindanao (BARMM).

Kini ang giluwatan nga pahayag ni MILF peace implementing panel chief Mohaguer Iqbal human sa plebisito sa pito ka probinsiya ug duha ka dakbayan sa mugnaon nga Bangsamoro region sa Mindanao.

Gitakda nga magpulong ang BTA aron pangandaman ang pagbalhin sa panggobyerno nga pangulohan ni MILF Chairman Aljads Murad Ibrahim isip interim chief minister sa Bangsamoro government.

Samtang, tapukon sab ni Presidente Duterte ang mga katugbang sa mugnaon nga BARMM nga nagagikan sa nagkadaiyang sektor.

Una nang gipamahayag ni MILF Vice Chairman Gadzhali Jaafar nga andam na sila aron pamunoan ang Bangsamoro government.

Tumong sa BARMM nga matubag ang dugay na kaayo nga problema nga giatubang sa katawhang Bangsamoro sa Mindanao.

Nanghinaut si Iqbal nga suportahan sa ubang nasud ang BARMM susama sa ilang gihimo sa ARMM. (Edgar E. Fuerzas)