KINILO nga bugas ug bible ang gihatag isip gasa ngadto sa mga edaran nga kababayen-an daplin sa dan ug sa mga piniriso sa mga pulis sa Mandaue City Police Office human sa ilang pagpangharana su’d sa dul-an lima ka oras, Huwebes sa buntag, Pebrero 14.
Samtang 136 gyud ka mga paresan sa Mandauehanon ang naka-benipisyo sa libre nga pakasal nga gipasiugdahan sa kagamhanan sa Mandaue City.
Imbes nga sa naandan nga mga bulak ug chocolates ang ihatag atol sa gitawag nga 'adlaw sa gugma', kinilo nga bugas humay ug bibliya ang gipanghatag sa mga pulis ngadto sa ilang gipangharanahan, uban na usab tagsa ka bulak nga rosas.
Pinanguluhan ni MCPO director Senior Supt. Julian Entoma, kantang binisaya kalabot sa gugma ang ilang gidalit sa mga mamaligyaay og bulak ug bisan na sa traffic enforcer, nga anaa atubangan sa St. Joseph National Shrine parish church.
Gitug-an ni Entoma nga mas gipili nila nga bugas ang ihatag imbes nga chocolate, kini aron masiguro nga busog ang tiyan. Ug adunay bible, aron busog usab unya ang ilang mga kalag.
“Kanang mga chocolate, pwede man ka makapalit og tag P5 lang kon ganahan gyud ka mokaon, pero mas kinahanglan man nato ang bugas, kay mas mao ni ang dapat anaa sa importante nga tulo ka kaon nato matag adlaw. Bibliya aron mapahinumduman sila sa mga pulong sa Dios, basin pa diay makaamgo ug makatabang sila usab sa atong kawsa alang sa kahapsay ug kalinaw, diha usab sa ilang pagpangumbinse sa ilang pamilya ug kaila nga likayan na ang mga illegal,” saysay ni Entoma.
Nga gikalipay usab pag-ayo sa mga nakadawat niini. Gani nahimo nga emoyonal si Benjie Ruales, usa ka babaye nga traffic enforcer sa Traffic enforcement agency of Mandaue kun TEAM sulod na sa lima ka tuig.
“Lami man diay sa pamati nga susama’g naa sad naka-appreciate sa imung mga gipangbuhat, sa halos kada-adlaw ug tibuok adlaw nako dinhi sa dalan, ang simple nga paghatag aning rose, ug kining bugas,nakapalipay na kaayo nako ug nila nga nahatagan,” kahilakon nga pamahayag ni Ruales.
Gipangharanahan ug gihatagan usab og bugas sa taga MCPO, ang mga edaran nga nag-inusara nga naglakaw sa dan, mga mamasurahay, ug manglipyuhay sa da’n.
Wala usab kalimti sa pagpangharana sa mga sakop sa Polcie Community Relations, pinanguluhan sa ilang tigpamaba sa MCPO, Chief Inspector Mercy Villaro nga dalitan og kanta ug paghatag og bulak ang mga magtutudlo sa usa ka pampublikong tunghaan ug ang mga babaye nga piniriso sa prisuhan sa headquarters.
Samtang 136 usab ka paresan sa nag-ipon og lima ka tuig pataas na ang malipayon ug nagbalik lantaw sa ilang unang pagbati og gugma sa ilang partner. Human nga naka-benipisyo sa programa sa kagamhanan sa Mandaue City, ang mass wedding.
Usa sa nakabenipisyo kanila ang 32 ka tuig na nga nag live-in nga sila Moises, 54 anyos ug Ana Mae Basiga, 53 anyos, taga barangay Cabancalan.
Ang duha adunay usa ka anak ug lima na ka apo. Giangkon nila nga kalisud ang rason ngano karon lang sila nakasal, pinaagi sa mass wedding.
Si Mandaue City Mayor Luigi Quisumbing ang ni-officiate sa kasal.
Tambag sa mayor ngadto sa mga bag-ong gikasal aron malikayan nga magkabuwag bisan unsa pa man ang mga problema nga atubangon, ang kanunay lang gyud paghinumduman kon ngano sila nagpakasal, ang ilang gugma sa usag-usa ug nga kinahanglan nga anaa ang Ginoo sa tunga-tunga sa ilang pagpuyo.
Anaa usab ang pipila sa mga department head ug mga konsehal sa syudad ug bise mayor Carlo Fortuna.
Ug ang mga sponsor sa cake, singsing, ug uban pa, sama sa Zonta club Cebu.
Gihimo ra sab sud sa Manduae City Sports Complex dili lang ang seremonyas sa civil wedding apan lakip na ang pakaon, slicing of cake ug bisan na ang pag-toast sa wine, agig panghinaot sa maayong pagpuyo sa mga bag-ong kasal.