DILI pag-renew sa business permit sa Liv Super Club ug pagsubay sa uban pa nga mga clubs sa Dakbayan sa Mandaue ang gipatun-an karon ni Mandaue City Mayor Luigi Quisumbing sa city legal department.
Human nakadawat na og komunikasyon ang mayor kalabot niini gikan sa Mandaue City Police Office.
Gawas sa Liv Super club, giangkon ni Police Senior Supt. Julian Entoma nga aduna pa silay laing duha ngadto sa tulo ka mga clubs sa syudad sa Mandaue nga ilang gipaubos sa surveillance.
Kini tungod sa report nga aduna usab nahitabo nga distribusyon sa ilegal nga drugas sama sa party drugs.
Apan vocal si Entoma sa iyang rekomendasyon ngadto sa kagamhanan sa Dakbayan sa Mandaue, alang sa dili na pagpa-renew sa permit sa Liv Super Club.
Human usab kini ginganlan gyud sa Police Regional Office 7, nga diha nahitabo ang mga pagpamaligya ug paggamit sa party drugs sama sa Ecstasy, gani nalakip kini sa matrix sa Ecstasy distribution sa Sugbo.
“Kahibalo mi unsa ka supportive ang Mandaue City government sa atong mga programa, pero among giklaro, nga wala ta nag-recommend og revocation, ang ato dili na ma-renew, kon nakapa-renew na sila pag-Enero, paabuton nato kunus-a mo-expired ilang permit. Pero gamay ra man sad siguro ang mahatag sa panudlanan sa gobyerno sa maong mga clubs, kaysa kadaot nga posible niini nga mahimo sa mga batan-on, sa mga tawo ug bisan na sa the whole Mandaue City, “ pagpasabot ni Entoma sa Superbalita Cebu.
Gitug-an ni Quisumbing nga nakadawat siya sa opisyal nga komunikasyon gikan sa MCPO, Myerkules,Pebrero 13, kalabot sa rekomendasyon ni Entoma, ug gipatun-an na niya kini sa ilang mga abogado sa City legal department.
Ang laing duha ngadto sa tulo mga club sa syudad, matud ni Quisumbing, bisan kon wala pa girekomendar ni Entoma nga ipasirado o dili pabag-uhan og permit, lakip gihapon sa gipatan-aw.
“We receive the communication from MCPO yesterday, (Feb. 13) regarding Liv and other clubs around Mandaue City, this is something the city of Mandaue is very careful about for a very long time, gani, if you noticed as early as 2016 we have been saying some of these clubs are being used as distribution points for drugs. We are willing to work with the MCPO and PDEA to make sure nga ma-stop gyud nato ang drugs ug party drugs dire sa dakbayan sa Mandaue, as a matter of fact ako ng gi-forward sa Mandaue City Legal Department to study their recommendations and to see what can we do,” gitug-an ni Quisumbing.
Madawat sa mayor ang inisyal nga finding sa City Legal Department, Biyernes, Pebrero 15.
Gipatan-aw na usab kon, nakapa-renew na ba ang maong mga club, ilabi na ang Liv Super Club.
Sa pangutana kon na-renew na ang ilang mga permit, unsay mahimo sa kagamhanan, tubag ni Quisumbing, “Siguro, MCPO will not recommend for non-renewal if they don’t have strong basis, so that is why our city legal is sitting down with the MCPO to discuss their basis (for non-renewal).”