GISAULOG kagahapon ang Valentine’s Day, ang adlaw sa gugma. Sumala sa usa ka survey sa Social Weather Stations (SWS) nga gipagawas niadtong Miyerkoles, 51 porsento sa mga Pilipino malipayon kaayo (very happy) sa ilang love life.
Ang 36 porsento niingon nga mas malipayon pa unta sila (could be happier) samtang 13 porsento niingon nga wa gyud silay love life. Mas ubos ang resulta sa maong survey kon intandi sa 2017.
Sa maong survey, 57 porsento niingon nga malipayon kaayo sila sa ilang love life, 29 porsento ang niingon nga mas malipayon pa unta, samtang 14 porsento ang niingon nga wa gyud silay love life.
•••
Apan ang love life lahi ni sa sex life. Sama niadtong managkumpare nga nag-estoryahay sa ilang sex life. Ang usa niingon nga sigi lang gihapon sa iyang sex life uban sa iyang batan-ong asawa.
Ang ikaduha niingon nga ang iyang sex life mora nag Coke. Matod pas iyang kumpare, “Tam-is diay kaayo, pre.” Matod pas ikaduha, “Mora bag Coke. Kaniadto regular, unya nahimong light, karon zero na gyud.”
Sumala pa sa maong survey mas daghan ang mga dalaga kay sa mga ulitawo nga way love life. Niabot sa 59 porsento sa mga dalang babaye ang niingon nga wa silay love life, ikomparar sa 43 porsento nga mga ulitawong lalake nga way love life.
•••
Samtang ang mga lalake ug babaye nga 25 anyos ang edad pataas niingon nga mas malipayon sila sa ilang love life. Sa mga kalaken-an nga 25 anyos ang edad pataas, 53 ngadto sa 58 porsento niingon nga malipayon sila sa ilang love life.
Mas taas kini kon ikomparar sa 39 porsento sa nagpangedaron og 18 ngadto sa 24 anyos nga niingon nga malipayon sila sa ilang love life. Samtang sa mga babaye nga nagpangedaron og 25 ngadto sa 54 anyos, 47 ngadto sa 59 porsento niingon nga malipayon sila sa ilang love life.
Apan dihay ulitawo nga nagpahimad didto sa Manila. Gitan-aw sa nanghimad ang mga badlis sa ilang palad ug niingon, “Mapalad ka sa sex.” Matod pa sa ulitawo, “Sa ato pa daghan kog ma-uyab.” Niingon ang naghimad, “Dili. Palad ra gyud imong ika-sex.”