USBON nako nga wala ako mo-kuwestiyon sa dagan sa imbestigasyon sa kapulisan sa pagpamanhig ni San Fernando Mayor Lakambini Reluya, sa iyang bana nga si Association of Barangay Council (ABC) federation President Ricardo “Nonoy’”Reluya ug kaubanan. Apan di usab kalikayan nga sama sa huna-huna ug panahom sa mga ordinaryong tawo nga nagsunod sa panghitabo, motumaw ang mga pangutana ug mga pagduda.
Samtang trabaho sa kapulisan ang pag-imbestigar, dili usab kapugngan nga daghang mga pangutana ang mabinantayong publiko. Dili man dayon molamoy ang publiko sa bisan unsa na lang nga version nga ipagawas sa kapulisan. Sama sa akong gikaingon nga kining kalambuan sa kaso mas daghang mga pangutana kay sa mga tubag.
Una, gitumbok ni Giovanni Perez, usa sa mga civilian escorts ni Mayor Reluya, kinsa naka-survive sa pagpamanhig, nga si Jerome Labitad usa sa upat ka mga suspek. Mitumaw usab ang ngalan ni Felix Abacajan. Sila si Labitad ug Abacajan pulos gun-for-hire ug wanted. Giunsa kaha sa pag-ila ni Perez si Labitad? Adunay laing saksi, Felix Bucog, nga nagkanayon nga nag-bonnet o nagtaptap sa nawong ang killers. Mailhan kaha nimo ang tawo nga nagtabon sa nawong? Nganong wala man kuhai og pamahayag si Bucog?
Karong bag-o, gibutyag sa kapulisan nga ang basiyo sa mga bala nga nakuha sa crime scene, mitakdo sa mga bala nga nakuha sa hideout ni Labitad sa dihang nakig-pinusilay siya batok sa mga pulis sa miaging semana sa dihang gi-serve unta ang warrant of arrest batok kaniya. Kining puntuha, circumstantial evidence ni. Dili na lang ko mo-kuwestiyon ani kay technical matters ni ug findings sa ballistic examination. Mga basiyo lang sa bala? Asa ang armas? Dunay mga bala nga puwedeng gamiton sa laing armas. Matag armas nagkalain-lain ang characteristic. Dili kini igong makapakonbikto og akusado.
Ang akong pahinumdom sa kapulisan nga lahi ang level sa imbestigasyon ug lahi ang pagpasaka og kaso ngadto sa piskaliya ug pagtaral sa mga akusado sa hukmanan. Dili ko abogado apan kining gihuptan karon nga mga ebidensiya, dili pa na igo. Criminal case ni ug gikinahanglan nga makombikto ang mga akusado “beyond reasonable doubt.” (bobbygnalzaro@gmail.com)