ANG Kapuso comedy genius nga si Michael V ang nangulo sa Bubble Gang cast alang sa live musical play nga “Parokya Nato’: A Laugh Story” nga ipasundayag sa Waterfront Cebu City Hotel & Casino karong gabii.
Kauban niya sila si Kim Domingo, Chariz Solomon, Valeen Montenegro, Antonio Aquitania, Paolo Contis, Jackie Rice, Denise Barbacena, Lovely Abella, Sef Cadayona, Betong Sumaya, Mikael Daez, Archie Alemania, Mikoy Morales, Analyn Barro, James Macasero, Roadfill Obeso, Myka Flores ug Diego Llorico.
Matud ni GMA RTV VP & Head Oliver Amoroso nga gituyo gyud pagdala sa Cebu ang maong dula aron ikapakita kon unsay ikapakita sa mga artista niini aron paglingaw sa mga Sugbuanon.
Gasa usab kini alang sa mga Sugbuanon sa pagsunod sa Bubble Gang, matud Janine Piad-Nacar, ang GMA VP for Business Development, Department II. Naghinamhinam na hinuon ko.
•••
Di ko kabasol sa mga nagduda nga ang pag-angkon sa LisQuen gitayming sa pagpasalida sa ilang pelikula nga Alone/Together kon ngano bitaw nga gipaduol gyud sa petsa sa pagsalida?
May epekto ba sa kita sa pelikula ang ilang pag-angkon? Basin, wala pero daghan sab gyud tingali ang naghinamhinam nga makakita sa pelikula sa duha tungod kay dugay na silang way proyekto.
Kon makadugang sa kita ang ilang pag-angkon, aw di wow!
•••
Nisunod gyud sa lakang sa inila ug respetadong magsusulat ug direktor nga si anhing Alvan Claude Evangelio ang iyang anak nga si Lorenz.
Human sa pipila ka proyekto sama sa Calamba Joe, dula nga musikal sa kinabuhi sa nasudnong bayani nga si Jose Rizal, ipasundayag karong Marso 15 sa CAP Art Gallery sa Osmeña Blvd. ang Inday – Paabuta Ako Sa Langit.
Mga panghinaot sa malampusong pasundayag, Lorenz ug mga sakop sa Al Evangelio Artist Stable Pasundayag Sugbo!
•••
Desidido gyud ang ABS-CBN nga malingaw ang mga nagsunod sa mga pasundayag sa iWant mao nga nakig-alayon kini sa Smart Communications ug Globe Telecom aron mapasalida ang mga pasundayag sa network sa mga mobile subscribers sa barato nga mga promo.
Wa na tay mahimong trabaho aning kalakiha. Haha!
•••
Nalingaw ko aning endorser o commercial model sa usa ka produkto nga panglimogmog kon magkarat ang tunlan.
Nakaingon ko nga kon modugang og timbang si Yeng Constantino, ingon adtong bayhana gyud ang iyang dagway.
Di man sab hinuon dautan kay bisan ‘himsog’ ang maong babaye, gwapa ra man gihapon kini.