ATOL sa inspeksiyon sa tinugyanan sa Regulatory and Complaint Board (RCB) sa mga inn, hotel, ug motel medyo mingaw kini ug dili mga fully booked niadtong bisperas sa Valentine's Day.
Sa pakighinabi kang Atty. Edgardo Uy, tsirman sa RCB, nga walay nagpa-reserve sa mga hotel.
“Mingaw man, dili man sila mga fully book, nangutana gale mi kumusta ang reservation para ugma (Valentine's Day) ana sila nga wala man daw kaayo,” matud ni Uy.
Giingong matag bulan duna kini sila’y mga gitutokan nga mga dapit sama sa bulan sa Enero diin spa ang mga gipangsusi, ug bulan sa Pebrero mao ang mga hotel, inn, ug motel kini tipik sa hugot nga kampanya sa pagdili sa mga menor de edad nga mosulod niining maong mga patigayon nga dili kauban ang mga ginikanan.
“Atong gatan-awon dinhi ang compliance sa ordinasa labi na kining minors, kay di pwedi ang minors nga unaccompanied nga mu check-in lugar dinhi pananglitan nga dunay minor nga iyang kauban dili niya ig-unsa nga hamtong dili sab na pwedi,” matud ni Uy.
Samtang, pipila sa mga nakita nga problema sa mga motel ang walay logbook, dili kaayo limpyo, ug kulang sa closed-circuit television cameras.
“Ang common gyud nga violation wala pa ang ilang logbook for minors, ang ilang business permits updated so far,” matud ni Uy.
Gidugang pa usab niini nga kinahanglan gayud nga magbaton ang mga patigayon niini ilabi na nga lakip kini nga rekisitos ug anaa sa ordinansa.
“Kinahanglan kaning mga mga inns, motels, ug hotels mag-maintain sila og separate logbook for minors kay pananglitan dunay minor nga giuban sa iyang ginikanan isuwat gyud didto para naa gyud separate nga logbook sa minors kay mao nay tan awon sa atong CSWD kay gi require na sa ordinansa,” matud ni Uy.
Nagpahimangno usab kini sa maong mga patigayon nga angayang atimanon ug e-mentinar usab ang kalimpyo ilabi na nga katulganan.
“Tan-awon sab nato ang kalimpyo sa palibot kay naay usa ang beddings kulang sa alegrar dunay mga mantsa gale nga namatikdan kaning mga ingon ani lodging house, katulganan, puy-anan kinahanglan nga limpyo sab gyud,” dugang ni Uy.
Upat ka mga lodging houses, inn, ug hotel ang giisyuhan sa RCB og notice of inspection findings ug gihatagan og napulo ka adlaw aron nga atimanon ang mga kakulangon.
“Ang RCB dili anti-business para ni maprotektahan ang mga kabataan ug kung dili na magpasulod ang mga inn, hotel sa mga minors dili man sab na ang mga minors mopugos, mahadlok na pud sila,” matud usab ni Antonio Resma Jr., RCB secretary ug inspectorate team leader.