SUSAMA sa nanglabay nga mga tuig sa kasaulogan sa Valentine's Day, dunay taas nga pagsaka sa presyo sa bulak, ilabi na ang rosas, sa bisan asa nga mga flower shop sa siyudad sa Cagayan de Oro.
Ang kanhi P10 nga rosas misaka kini sa P75 ngadto sa P100 ug gani duna pa’y P200.
Samtang, ang usa ka dosena nga rosas anaa sa P1,000 diin flower bouquet na kini samtang anaa sa P1,500 ang duna’y tsokolate.
Sa pakighinabi kang Evelyn Torralba-Macapanas, tag-iya sa ETM flower shop duol sa St. Augustine Cathedral, taas gyud kaayo ang pagsaka sa presyo sa mga bulak.
“Na grabe gyud kaayo ang presyo, kani gyud ang roses mao gyud ang grabe ka-mahal, kami mohatag mi mga P600-P700 ang uban mas mahal pa gani,” matud ni Macapanas.
Apan bisan pa man usab sa kataas sa presyo, daghan gihapon ang mga order ug mga tawag aron sa pagpa-deliver ug pagsorpresa ngadto na sa ilang mga hinigugma.
Giingong kini nga mga bulak gikuha pa gikan sa Davao, diin anaa ang dosena sa P250 hinungdan nga mas dako na ang presyo pag-abot sa siyudad.
Samtang sa lain usab nga flower shop, lakip mismo kini ang miping-it sa kamahal sa presyo sa bulak diin giingong halos taga li-og na kini.
“Mahal na gyud kaayo halos na gyud taga-liog, pero naa man gihapon mamalit pud,” matud sa usa sa mga tindero sa flower shop sa may Capistrano street.
Apan matud usab sa mga bana nga sinserong naghatag og bulak sa ilang mga minahal sa kinabuhi nga dili niini igsapayan ang presyo sa bulak gumikan na usab kay ang importante nga naghatag kini og panahon ug “effort” aron sa pagpadayag sa iyang tinud-anay nga gugma.
Makitang daghan usab nga mga pakulo sa mga nagkadaiyang patigayon sama sa mga Valentine's promo, aron na usab nga mahatagan sa kahigayonan ang mga nagminahalay sa pagselebrar pinaagi sa mga dinner date ug uban pa. (KCS)