KON maghisgot og Cagayan de Oro, ang unang mahunahuna-an mao ang white water rafting nga maoy gidayo sa mga local ug langyaw nga turista sa dapit.
Apan alang sa dili mahiligon og water adventure, niay bag-ong tourist attraction nga nahimutang sa highest peak sa Cagayan de Oro, ang Amaya View CDO.
Kanhing gitawag og Sierra del Oro, nahimutang ang Amaya View CDO sa Indahag Hills, Cagayan de Oro, 30 minutos gikan sa city proper.
Mamahimong mosakay og taxi kon moadto sa Amaya View CDO apan gikinahanglang magmatngon lang sanglit padayon pang gi-ayo ang dalan padulong dinhi.
Sa P50 nga entrance fee, makita ang overlooking view sa tibuok siyudad sa Cagayan de Oro.
Aduna sab kini mini zoo nga adunay lain-laing klase sa langgam, unggoy, buwaya, civet cat, bitin, ug ang center of attraction nga tigre nga si Noah.
Mamahimo sab makapa-picture sa life-sized nga Transformers ug helicopter.
Alang sa mga adventure-seekers, mitanyag ang Amaya View CDO ug mga activities sama sa rappelling, high ropes, trampoline, zip line, ball pit, ug paragliding.
Adunay snack bar, coffee shop, ug mga kan-anan sa dapit.
Sa kasamtangan, wala pa giablihan sa management ang infinity pool.
Adunay gitukod nga Noah’s Ark kon asa ipahiluna ang mga mananap gikan sa mini zoo.
Haum bisitahon ang Amaya View CDO matag summer ug kon bugnaw ang panahon.