BUOT sa tsirman sa komitiba sa tourism sa Konseho nga pabutangan og closed-circuit television (CCTV) camera nga konektado sa internet ang mga patigayon sama sa motel, lodging house, ug mga hotels sa dakbayan sa Cagayan de Oro.
Gibutyag ni Atty. Edgardo Uy, tsirman sa Regulatory and Complaint Board (RCB), nga sa inspeksiyon niadtong bisperas sa Valentine's Day, nasayran nga guba ang CCTV sa pipila ka mga patigayon nga nasusi sa RCB.
“Duna’y usa nga ang CCTV niya while naa pero dili functional,” matud ni Uy.
Gibutyag ni Kagawad Jay Roa-Pascual, tsirman sa tourism, nga plano niini nga angayang butangan og CCTV nga konektado sa internet aron nga ang RCB dili na maglisod sa pagmonitor sa mga mosulod ug mogawas sa mga balay pahulayan.
“Ato gyud ning paningkamotan nga ila gyud ning ayuhon kay dapat na gyu'y CCTV nagplano na gale ko puhon-puhon dapat ang CCTV nila naa nay connect sa internet para mismo ang RCB pwedi na maka monitor anytime sa ilahang mga inn, sa mga motel,” matud ni Pascual.
Gidugang pa niini nga dili sa ingon nga wala kini salig sa mga negosyante sa mga susama niini nga patigayon apan mas maayong dunay mata ang tinugyanan sa RCB nga mismong kini ang makamonitor.