GIPAMULTA sa National Basketball Association (NBA) ang sentro sa Philadelphia Sixers nga si Joel Embiid tungod sa pagsaway sa referee niini atol sa ilang kapildihan sa Boston Celtics sa niaging adlaw.
Matod pa sa NBA kagahapon nga si Embiid pamultahon og $25,000.
Ang pagsaway nahitabo sa katapusang bahin sa iyang post interview diin iyang gikuha ang microphone ug dayong buhi sa iyang katapusang pulong, “And the referees f----- suck.”
Ang 24-anyos nga Cameroonian nasagmuyo human sa ilang dakong kapildihan sa Celtics niadtong Martes.
Kadto maoy ilang ikatulong kaparutan sa mga kamot sa Celtics sa karon nga season.
Samtang sa laing bahin, opisyal nang nahisakop si Jeremy Lin sa Toronto Raptors kagahapon.
Wa man tuod mabutyag ang hingpit nga detalyi sa kasabutan, apan matod pa nga si Lin miuyon nga i-buy out ang iyang kontrata sa Atlanta Hawks karong semanahona.
Kini maoy ikawalong team nga nabalhinan ni Lin sukad sa iyang pagsulod sa NBA.
Human wa makapirma og kontrata sa 2010 NBA Draft, si Lin gikuha sa Golden State Warriors human sa iyang summer league sa Dallas Mavericks. Nakaduwa usab siya sa New York Knicks, Houston Rockets, LA Lakers, Charlotte Hornets ug Brooklyn Nets sa wala pa siya matapo sa Atlanta Hawks. (JBM)