MIPAKATAP og 29 puntos si Damian Lillard aron pangulohan ang Portland Trail Blazers sa pagpakgang sa Golden State, 129-107, sa National Basketball Association (NBA) diin na-ejected si Warriors coach Steve Kerr.
Midugang og 17 si Jake Layman alang sa Blazers kansang laing walo ka mga players nakakulit og double figures.
Tagsatagsang mipupo si Kevin Durant ug Stephen Curry og 32 puntos samtang gipapahuway sa Warriors si DeMarcus Cousins human kini mipadaog sa Golden State sa niaging adlaw batok sa Utah.
Sikit ang duwa sa unang tulo ka mga quarters, apan ang jump shot ni Laymans sa fourth quarter, 104-101, maoy nahimong likuanan alang sa sakto nilang dominasyon.
Na-ejected si Kerr human kini grabing nakareklamo ug gisyagitan ang mga referees sa dihang gitawagan og flagrant foul si Draymond Green ngadto ni Collins sa katapusang 3:54 ang nahabilin sa duwa.
Samtang sa laing duwa mikulit og 42 puntos si Jordan Clarkson sa Cleveland Cavaliers apan daw og sa nasayang lang kini human masugamak na usab sa kapildihan ang Cleveland Cavaliers, 143-139, batok Brooklyn Nets sa duwa nga miagi og tulo ka overtime sa nagpadayong nga season sa National Basketball Association (NBA).
Kini mao gyud unta ang pinakadakong puntos nga napuga ni Clarkson sukad sa iyang pagsulod sa NBA niadtong 2014 Drafting diin siya napili sa Washington Wizards sa ika-46th sa overall pick.
Ang Nets gipangulohan ni D’Angelo Russel, kanhi kauban ni Clarkson sa Los Angeles Lakers, kinsa mipuga og 36 puntos, 14 niini sa ikatulong overtime.
Dumadaog na unta ang Cleveland sa second overtime apan ang tres ni DeMarre Carrol maoy nakapatabla sa score.
Miabot og 23 ka higayon nga nagpulipuli og sakmit ang matag habig sa labaw sa maong duwa.
Sa laing panag-engkuwentro, mipakatap og 27 puntos si Jeff Teague, midugang og 25 sa Karl-Anthony Towns ug ang Minnesota Timberwolves mipatugpa sa Houston Rockets, 121-111, bisan pa man sa 42 puntos ni James Harden.
Kini maoy ika-31 nga sunodsunod nga naka score si Harden og 30 puntos o kapin diin iyang natupngan si Wilt Chamberlain sa ikaduhang puwesto isip pinakataas nga nakahimo sa ingon sa kasaysayan sa NBA.
Samtang gipangulohan ni Joel Imbiid ang Philadelphia Sixers ngadto sa 126-111 nga kadaugan baatok sa New York Knicks.
Si Embiid mitali og 26 puntos, 14 ka rebounds nga gidugangan og 25 ni Tobias Harris og laing 18 gikan kang Ben Simmons.
Ang Toronto Raptors misandig sa 44 puntos ni Pascal Siakam kinsa nakalangkat usab og 10 ska rebounds aron lupigon ang Washington Wizards, 129-120.
Midugang usab og 22 si OG Anunoby ug double-double usab si Serge Ibaka pinaagi sa iyang 10 puntos ug 13 ka rebounds alang sa Toronto kinsa miduwa nga wala ang ilang All-Star nga si Kawhi Leonard tungod sa angol sa walang tuhod niini.
Ang bag-og nakuha nga si Jeremy Lin nakaduwa usab as Raptors sulod sa 25 minutos. (JBM)