NANGHATAG ang City Office for Substance Abuse Prevention (Cosap) og school supplies ngadto sa mga anak sa drug surrenderers atol sa kasaulogan sa Valentine’s Day kagahapon, Pebrero 14.
Matod ni Gary Lao, pangulo sa Cosap nga usa kini sa ilang pamaagi para mapakita ngadto sa drug surrenderers nga ilaha sab gitagaan og pagtagad lakip ilahang mga pamilya.
“This is one way of showing that the Cebu City government is not only taking care of our drug surrenderees, as well as ato sad gi take care ang families by distributing school supplies, bag, ug notebooks atong gipanghatag nila, this is in preparation usab sa umaabot nga klase, at least di na sila mamalit og mga notebooks,” sigon niya.
Adunay 225 kabuok ka mga anak sa drug surrenderers ang nakadawat sa maong school supplies nga gipang gahin sa Cosap, 177 ang mga estudyante sa elementarya ug 48 niini ang anaa sa high school.
“Last year nakapanghatag naman ta nila og 5 kilos of rice, so kani (school supplies) there are 225 clients nato nga atong tagaan, 177 for the elementary and 48 sa high school, ang katong wala naa man ta’y everyday nato nga barangay base kami nalang ang mohatod,” saysay ni Lao.
Gihangyo sab ni Konsehal Sisinio Andales sa iyang mensahe ang mga drug surrenderers nga di na mobalik sa pagka lambigit sa ilegal nga drugas.
Samtang, gibisita sab sa Cosap ang Barangay Budlaan kagahapong adlawa diin nahimotang ang yuta nga gipanag-iya sa Cebu city government nga usa sa mga site nga ilang giplanohan nga tukuran og rehabilitation facility sa siyudad nga alang sa drug surenderers.
Apan giklaro ni Lao nga wala pa kini mahatagi og budget sa siyudad tungod kasamtangan pa sila karong nag-susi og mga yuta nga haom nga tukoran sa maong pasilidad.
“Wala pay budget kay wala pama’y lot, but the Mayor already told us that the city is willing to give,” dason niya sa SunStar Cebu. (Kiziah Marie T. Suello, USJ-R Intern)