ANG kapulisan ug local government units (LGU) nag-iyahay sa pagpanghimog gimik atol sa kasaulogan sa Valentine’s Day kagahapon.
Dunay nanghatag og mga bugas ug bibliya.
Naa say ni-sponsor og pakaon sa mga magtiayon nga naa lang sa mga karsada nagpuyo.
Duna say ni-sponsor og mas wedding sa mga nag-live in og di mominos lima ka mga tuig.
Gasa
Kinilo nga bugas ug bibliya ang gihatag isip gasa ngadto sa mga edaran nga kababayen-an daplin sa dan ug sa mga piniriso sa mga pulis sa Mandaue City Police Office.
Ila ning gitunol human sa ilang pagpangharana sud sa dul-an lima ka oras, Huwebes sa buntag, Pebrero 14.
Samtang 136 ka mga paresan sa mga Mandauehanon ang naka-benipisyo sa libre nga pakasal nga gipasiugdahan sa Kagamhanan sa Mandaue City.
Imbes nga sa naandan nga mga buwak ug chocolates ang ihatag, kinilo nga bugas humay ug bibliya ang gipanghatag sa mga pulis ngadto sa ilang gipangharanahan, uban na usab ang tagsa ka rosas.
Pinanguluhan ni MCPO director Senior Supt. Julian Entoma, kantang Bisaya kalabot sa gugma ang ilang gidalit sa mga mamaligyaay og bulak ug bisan na sa traffic enforcer atubangan sa St. Joseph National Shrine parish church.
“Kanang mga chocolate, pwede man ka makapalit og tag P5 lang kon ganahan gyud ka mokaon. Pero mas kinahanglan man nato ang bugas, kay mas mao ni ang dapat anaa sa importante nga tulo ka kaon nato matag adlaw. Bibliya aron mapahinumduman sila sa mga pulong sa Dios. Basin pa diay makaamgo ug makatabang sila usab sa atong kawsa alang sa kahapsay ug kalinaw, diha usab sa ilang pagpangumbinse sa ilang pamilya ug kaila nga likayan na ang mga illegal,” saysay ni Entoma.
Wa usab kalimti sa pagpangharana sa mga sakop sa Polcie Community Relations, pinanguluhan sa ilang tigpamaba sa MCPO, Chief Inspector Mercy Villaro, ang mga magtutudlo sa usa ka pampublikong tunghaan ug ang mga babaye nga piniriso sa prisuhan sa headquarters.
Samtang 136 usab ka paresan sa nag-ipon og lima ka tuig pataas na ang malipayon ug nagbalik lantaw sa ilang unang pagbati og gugma sa ilang partner.
Sila naka-benipisyo sa mass wedding program sa Kagamhanan sa Mandaue City, ang mass wedding.
Usa sa nakabenipisyo kanila ang 32 ka tuig na nga nag live-in nga sila Moises, 54, ug Ana Mae Basiga, 53, taga barangay Cabangcalan.
Ang duha adunay usa ka anak ug lima na ka apo. Giangkon nila nga kalisud ang rason ngano karon lang sila nakasal,pinaagi sa mass wedding.
Si Mandaue City Mayor Luigi Quisumbing ang ni-officiate sa kasal
Tambag sa mayor ngadto sa mga bag-ong gikasal aron malikayan nga magkabuwag bisan unsa pa man ang mga problema nga atubangon, ang kanunay paghinumduman kon ngano sila nagpakasal.
Gihimo ra sab sud sa Manduae City Sports Complex dili lang ang seremonyas sa civil wedding apan lakip na ang pakaon, slicing of cake ug bisan na ang pag-toast sa bino, agig panghinaot sa maayong pagpuyo sa mga bag-ong kasal.
Pakulo sa Lapu-Lapu
Nalingaw ang mga Oponganon sa nagkadaiyang mga “gimik” nga gidalit sa kapulisan ug sa Lapu-Lapu City Government.
Ang Lapu-Lapu City Police Office nga gipangulohan ni Sr. Supt. Limuel Obon unang nangharana sa iyang mga sakop ug ubang mga Oponganon nga adunay transaksyon sa LCPO headquarters sama sa paglukat og police clearance sayo sa buntag.
Pulos sila giapuran og mga chocolate ug buwak.
Nilibot usab ang kapulisan sa mga pampublikong lugar sa dakbayan diin nang-apod apod sila og mga buwak ug chocolate.
“This is one way nga makita sa public nga kita sa pulis dili lang ta sa inisog, we also have our lighter side and ma-happy sad ta nga if we see the people nga ato gikantahan ug gitunolan og bulak nga happy sab, spread the love ba,“ matod ni Obon.
Usa sa nakadawat og buwak sa kapulisan mao si Zoraida Masinag, usa ka Muslim, kinsa niangkon nga wa siya makasabot sa hinungdan sa pagharana ug pagpanghatag og buwak sa kapulisan kon wa siya makadawat sa gamayng Valentine’s gift.
“Nalipay gyud ko kay apil ko gihatagan ani. Wala ko nagdahom kay wala man ni sa amo unsa ni? Valentine’s? Nindot sad diay mahatagan ka. Nalipay gyud ko kay para nako giisip nako nga usa ninyo,“ matod ni Masinag samtang naggunit sa buwak nga hinatag ni Obon dihang nahinabi sa Superbalita Cebu.
Gawas sa kapulisan tibuok adlaw usab nga nalingaw ang mga Oponganon sa “gimik” sa City Government nga FlashMob.
Ang gimik nakakuha sa atensyon sa katawhan sa mga pampublikong lugar sa dakbayan pinaagi sa gibuhat niining mga scenario sama kunohay sa nag-away nga mga manag-uyab nga misangpot sa pagtapok sa katawhang mga nanguryoso.
Apan nakurat na lang tanan dihang ang grupo nanayaw.
Ang flash mob gilangkuban sa 120 ka youth volunteers sa dakbayan nga nanayaw sa mga tukar nga may kalabotan gihapon sa gugma.
Gidagsa usab ang tibuok adlaw nga libreng masahe, tupi ug make-up nga gidalit sa City Government sa lobby sa Lapu-Lapu City Hall alang niadtong adunay mga transaksyon kagahapong adlawa.
Mga sakop sa Mahuyang Alang sa Kalambuan (MAS) ni libre sa ilang serbisyo.
“Wala ni sila bayad kay kapunongan man ni namo sa mga mahuyang ug asa ang needs namo naa gyud ni sila,” matod pa ni Lapu-Lapu City Mayor Paz Radaza.
Unang higayon
Mga sakop sa City Mobile Force Company sa Cebu City Police Office wa una manakop og mga kriminal sa kadalanan kay duna silay laing gibuhat atol sa Valentine’s Day.
Nahimo nang problema sa lokal nga kagamhanan sa Siyudad sa Sugbo ang mga pamilya nga naa ra nangatulog daplin sa karsada.
Kagahapon, Pebrero 14, ang kapulisan sa Siyudad sa Sugbo ilabi na ang CMFC, inabagan sa Police Advisory Council, nihimog pinalahi nga pamaagi sa pagselebrar sa Valentine’s Day.
Kini mao ang pagpanakop sa mga banag asawa nga naa ra sa daplin sa karsada dili aron prisohon kon dili, hatagan silag panahon nga makauban ang ilang mga anak dungan sa pagpangaon sa adlaw sa gugma.
Samtang nagsalo sila sa giandam nga pagkaon, giharanaan usab sila sa mga pulis aron mahimong romantiko ang ilang date.
Matod ni Catherine Cortes, nahadlok sila sa dihang gikalitan lang silag dakop sa mga pulis nga unta waa man silay nahimong dautan.
“Nahadlok mi permiro kay gipang dakop man mi hasta akong mga anak. Wala mi kahibalo nga pakan-on ra diay mi,” matod ni Catherine.
Gikalipay usab og dako nilang Sixto ug Rosalina Perales nga sa kadugay na sa ilang kaminyuon, karon pa sila naka date sa usag-usa nga naabot nag usa ka dosena ang ilang mga anak.
Aron makompleto pa ang ilang pag selebrar sa Valentine’s Day gidalitan usab silag red wine nga daw sama sa bag-ong kasal.
Nagdungan silag inom niini.
Matod ni Chief Insp. Chuck Barandog, hepe sa CMFC, nga sa sitwasyon sa kinabuhi sa mao nga mga magtiayon, wa na sila maghunahuna unsay bation kon magselebrar sa adlaw sa gugma.
“kining ingon ani nga klase sa tawo, they already forget nga naa ni nga celebration. It’s February 14 and it is Valentine’s Day. Tungod sa ilang situation, we want them to feel nga naa pa gyuy mga tawo, most especially sa government sector, naghunahuna pud sa ilaha,” matod ni Barandog. (AYB)