ANG pinakamaayong pagtagad gipasalig sa M'lang kon mahitabo na ang 2019 National Age-Group Chess Championships Mindanao Leg sa Marso 1 hangtud 3 sa SP Building, dakbayan sa M'lang sa North Cotabato.
Si M'lang Vice Mayor Joselito Piñol, atol sa Davao Sportswriters Association (DSA) Forum Huwebes, Pebrero 14, sa The Annex of SM City Davao, nagpasalig, “We don't have what other LGUs have but we can offer good if not excellent services to the delegates from tricycle drivers, hotel and inns and restaurants. We have briefed them already as well as the police.”
Sumala niya nga dunay mga 300 ka sumasalmot gikan sa nagkadaiyang bahin sa nasud ang gilauman nga makigtigi samtang ang ubang mga ginikanan ug coaches mosalmot sab youth chessers.
Dugang ni Piñol nga ang panagtapok sa M'lang aron suportahan ang torneyo nga magsilbi isip qualifying alang sa national championships nagmatuod giseryuso nila ang pagdumala niini.
“We do our best in everything may it be in sports activities or education-related. Even in the Sinulog, we finished second. Grabe ang preparation namin for this,” dugang pa niya, ug nagpasalig sa seguridad sa mga magduduwa.
Butangan sab og liaison officers ang matag inn ug hotel kon diin mag-estar ang mga magduduwa. Mag-andam sab sila og kapuy-an alang niadtong naglisud sa badyet.
Si National Chess Federation of the Philippines (NCFP) regional director James Infiesto, sa iyang bahin, nagsulti nga si grand master Eugene Torre maoy halandong mamumulong sa opening ceremonies nga ubanan ni Mayor Russel Abonado. Si Torre gitakdang mohimo og dungan nga exhibition matches uban sa mga pinili nga magduduwa.
“The top three finishers in 14 categories will advance to the grand finals where slots to the 201th Asean+ Age-Group Chess Championships in Myanmar are at stake,” pasalig ni Infiesto.
Iya sab nga gibutyag nga ang Philippine Sports Commission ug NCFP moabaga sa biyahe padulong sa Myanmar alang sa mga qualifiers.
Ang magnguna nga 10 ka magduduwa sa Mindanao leg sa boys and girls 20-below, 18-below, 16-below, 14-below, 12-below, 10-below ug eight-below makadawat og ganting salapi.
Mga kampeyon makadawat sab og tropeyo samtang ang ubang nangunang napulo mouli nga dunay medalya.