DAVAO DEL SUR -- Gimandoan sa Commission on Elections (Comelec) ang tanang kandidato nga tanggalon na ang ilang mga campaign materials nga anaa daplin sa Davao-Cotabato national highway.
Gibutyag ni Abogada Reyn Joy Bullecer, election officer sa Bansalan, nga aduna na silay giandam nga common poster areas.
Matud niya angayang motuman ang mga kandidato aron di masayang ang ilang gasto sa takna nga mohimo na og “Operation Baklas” ang Comelec ug kapulisan.
Daghan gihapon sa mga kandidato sa Davao del Sur ang wa motuman sa mando sa Comelec nga tanggalon na ang ilang mga propaganda niadtong Pebrero 11.
Makita sa daplin sa kadalanan ang mga naghitak nga campaign materials.
Matud sa Comelec nga anaa sa mga kandidato ang pagtuman o dili sa maong balaod apan nagbahad ang komisyon nga aduna gyuy manubag ug masilotan pag-abot sa panahon.
Sa Marso 29, magsugod ang kampanya sa lokal nga kandidato apan makita na sa palibot ang ilang dagway sa mga tarpaulin. (Orlando B. Dinoy)