GIPAHIBAWO sa Davao City Transport and Traffic Management Office (CTTMO) nga sukad Huwebes, Pebrero 14, dunay 12 sa 63 ka traffic signal intersections ang giayo.
Atol sa Ispeak media forum Huwebes, si CTTMO head Dionisio Abude nag-esplikar nga ang 12 ka intersections gibutangan og “wired sensors;” laing unom ka intersections gibutangan og ethernet modems; tulo gibutangan og flashers; tulo gibutangan sab og transfer relays; tulo uban sa DC Insulators; usa gibutangan og load switch; usa dunay loop detector; ug ang tulo gibutangan og pedestrian push buttons.
“After this repair, kaning 63 nato nga intersections [kay] expected nato nga kini tanan mag-function. Wala nay mag-flashing,” pasalig ni Abude nga dugang nagsulti nga ang pag-ayo ug pag-ilis sa proyekto magsulbad sa suliran sa trapiko sa dakbayan.
Dugang niya nga dunay mga higayon nga dunay pagkidlap-kidlap sa traffic lights tungod sa mga kaso sa emerhensiya ug pagbisita sa mga tag-as nga opisyal sa siyudad.
Ang Ispeak media forum sa milabay nga semana, si Traffic and System Engineering head Markbenson Pacatang nag-esplikar nga ang ubang mga wala na mogana nga mga traffic lights di pa maayo tungod sa nagpadayon nga proyekto sa dakbayan.
Ang pag-ayo ug pag-ilis sa proyekto nagsugod niadtong Enero 23 ug gilauman nga matapos una ang Mayo 21. Matud ni Abude nga duna silay upat ka adlaw nga nauna sa target.
Ang CTTMO, sa pakig-koordinar uban sa Traffic and System Engineering company, mag-instolar og bag-ong ethernet modems, direct current insulators, flashers, wired sensors, transfer relays, load switches, loop detectors, ug pedestrian push buttons isip kalamboan sa traffic signalization sa siyudad.
Niadtong milabay nga semana, ang lokal nga kagamhanan sa Davao nag-alokar og P10 milyon alang sa maintenance ug pag-ayo ug laing P6 milyon alang sa preventive maintenance sa traffic signals sa dakbayan alang ning tuiga. (LHC uban nila April Asgapo ug Shaira Mae Panilag, UM interns)