BISAN og gipahugtan sa pagpatuman ang election gun ban apan padayon ang nahitabong patay sa Davao del Sur.
Laing tawo na sab ang gipusil sa wa mailhing suspek samtang nagluto sa kusina sa ilang panimalay.
Alas 8:30 sa gabii, Dominggo, samtang naghikay sa ilang panihapon ang biktimang si Ramel Taping, 30, minyo didto sa Purok 3, Sitio Gumahan, Barangay Bunot, lungsod sa Kiblawan, Davao del Sur, dihang kalit niabot ang wa mailhing mamumuno.
Wa na makatiwas sa iyang gibuhat ang biktima human gidul-itan kini og 12 gauge shotgun, gipusil sa unom ka higayon.
Diha-diha natumba sa salog ang biktima ug gibawian dayon sa iyang hinulamang kinabuhi.
Sa resulta sa imbestigasyon sa kapulisan, nasayran nga ang biktima may unom ka mga samad sa walang bahin sa iyang dughan. Samtang may lima sab siya ka samad sa tuo nga bahin sa iyang likod human nilapos ang mga bala sa maong kalibre sa armas.
Gilantaw sa kapulisan nga personal ang motibo ug bikil sa duha ka partido ang naghatod sa biktima sa iyang kamatayon.
Di pa mahulagway sa kapulisan ang dagway sa suspek samtang nagpadayon ang imbestigasyon.
Bisan hugot ang paningkamot sa otoridad nga masikop ang mga tawong naghupot og mga armas nga way pagtugot gikan sa Commission on Election (Cemelec) apan padayon gihapon nga nakalusot ang mga nagbaton niini.
Giingong gwardiyado sa militar ug kapulisan pinaagi sa Comelec Joint Security and Control Center (JSCC) ang matag dapit sa probinsya diin gimuntar ang checkpoint 24 oras kada adlaw apan di kalikayan nga malutsan gihapon sila sa mga kriminal. (Orlando B. Dinoy)