USA ka 12-anyos nga bata ang napatay samtang laing usa ang samdan sa pagbusikad sa usa ka granada didto sa probinsiya sa Cotabato.

Ang kapulisan nag-ila sa namatay nga mao si Alex Librando.

Sa maong hitabo, nasamdan sab ang iyang uyoan nga si Tirzo Librando, ug pulos molupyo sa barangay Ugalingan Carmen.

Sa report nga nakuha gikan sa Cotabato Police Provincial Office, alas 7:40 sa buntag niadtong Dominggo nahitabo ang insidente.

Mga biktima mibisita sa ilang uma dihang giduwa-duwaan sa bata ang granada nga didto gibutang sa payag-payag sa iyang uyuan.

Sumala pa nga aksidenteng natanggal ang pin sa eksplosibo dayon nadungog ang masipang buto.

Nakabsan dayon sa iyang kinabuhi ang batan-on, samtang naka-angkon og samad sa lawas tungod sa igo sa shrapnel ang iyang uyoan.

Dali sab nga gisapupo sa ilang mga silingan si Tirzo ug gidala sa Cotabato Provincial Hospital nga anaa sa talandugong kahimtang.

Matud ni Carmen Chief of Police Senior Inspector Winston Seniel nga si Tirzo nalambigit sa nagkadaiyang krimen sa ilang dapit.

Labing uwahi niini mao ang pagpamanhig sa mga sibilyan nga ilang nakabangi sa yutang ilang gi-ugmad.

Sumala sa kapulisan nga posibleng madungagan pa ang iyang kaso gumikan sa paghupot og armas nga walay mga papeles, lakip na ang kamatayon sa bata tungod sa pagbuto sa granada.

Gitahasan na ni Cotabato Governor Jesus Sacdalan ang kapulisan nga tutukan pag-ayo ang imbestigasyon sa hitabo aron manubag ang sad-an sa insidente. (Edgardo Fuerzas)