PATAY ang usa ka kanhi sundalo nga gipusil didto sa siyudad sa Cotabato.
Biktima giila sa kapulisan nga si Totong Andres, 48 anyos, minyo, may ranggo nga staff sergeant kaniadto, ug molupyo sa Purok Sampaloc, sitio Manday, barangay Bagua.
Sa taho gikan sa Cotabato City Police Office, nasayran nga banda alas 2:00 sa hapon, Pebrero 14 nahitabo ang pagpatay sa kanhi sundalo.
Miguwa sa imbestigasyon nga samtang nagtindog ang biktima atbang sa Bunny Lodging House sa Bonifacio Street kalit kini giduol sa duha ka wala mailhing mga suspek, dayon gipusil gamit ang kalibre .45 nga pistola.
Namatay diha-diha dayon si Andres human malubngi og bala ang iyang ulo ug dughan.
Samtang mga suspek, abtik nga mikabayo sa motor ug misibat paingon sa wala masuta nga direksiyon.
Nagtuo si Cotabato City Police Director Senior Superintendent Willie Dangane nga personal nga atraso ang motibo sa hitabo.
Saysay sa opisyal nga sa wala pa gipatay ang biktima nakalalis pa niini ang mga tawong mipatay kaniya.
Pahayag sab ni Susan, asawa sa namatay, nga nakadawat og hulga ang iyang kapikas gikan sa wala mailhing grupo.
Sumala pa nga nagsugod kini dihang gipaabot sa biktima ngadto sa otoridad nga naghitak ang druga sa ilang dapit.
Ang kapulisan padayong nag-imbestiga aron masuta ang tinuod nga motibo sa pagpatay kang Andres.
Tumong sab nila karon ang pagpangita sa mga suspek aron mapatubag sa salaud nga nahimo. (Edgardo Fuerzas)