NIBAHAD nang daan nga maghikog ang hamtong nga lalake nga nakaplagang patay sa sunog sa Biyernes alas 9:23 sa buntag, Pebrero 15, sa Purok 8, Barangay Camputhaw, Dakbayan sa Sugbo.

Giingong nagumon sa illegal drugs ug naguol sa pagbuwag sa iyang asawa si Alexander Sanchez, 51.

Sa miaging semana, nagbilin na siya og suicide note.

Tulo ka mga balay ang naugdaw samtang laing duha ang nakan-an sa kayo.

Gibana-banang danyos moabot og P80,000.

Giisa lang sa mga bombero ngadto sa 1st alarm ang status sa sunog ug pagka alas 9:38 sa buntag gideklarar nga kontrolado na ang kayo.

Matod ni Fire Officer 3 Nelson Daculan, imbestigador sa Cebu City Fire Department, nagsugod ang kayo sa balay ni Visitacion Mendo, diin si Alexander nagpuyo.

Sa ilang imbestigasyon, si Sanchez ang gitumbok sa mga residente nga maoy naghikog pinaagi sa pagsunog sa iyang kaugalingon.

“Ingon sa igsuon ani niya nga naa kuno ni problema kay sa previous week, naa kunoy hulga niya, maghisgot nga maghikog. In and out kuno daw ni sa Kalunasan (Cebu city jail),” matod ni Daculan.

Dugang ni Daculan nga bisan sa sulti sa pamilya ug mga residente, ila pang subayon pag-ayo kon gituyo ba ang sunog.

Ang pag-umangkon ni Sanchez nga si Alexitas Rabong nagkanayon sa interview sa sibyaanang dyHP nga kagahapon sa buntag nang-lock na si Alexander sa sulod sa iyang kwarto ug nagpunay og yawyaw nga siya rang usa. Naghulga kini nga maghikog human wa na balika sa iyang asawa nga dugay nang nibiya kaniya.

“Siya ra siguro nag sunog kay sige man siyag yawyaw gud. Magyawyaw ra man nag kalit. Mang lock man gud na sa iyang balay gud. Sige siyag yawyaw nga maghikog kuno siya,” matod ni Rabong.



Bisan ang manghod niini nga si David niangkon nga sukad naoperahan sa bagul-bagul ang iyang maguwang nausab na ang batasan niini.

Adunay panahon nga maulian kini sa iyang maayong pangisip apan mobalik na usab og kalibog kon makasuyop na usab og shabu.

Sa miaging tuig, giingong gibato sa Alexander ug nabuak ang bagolbagol niini.

Gioperahan kini sa ulo.

Kanunay na kining mogamit sa illegal nga drugas diin adunay panahon nga tulo ngadto sa upat ka adlaw nga way kaon-kaon.

“Kana kon gikan mosuyop, dili man na mo kaon og upat ka adlaw. Naay usa ka semana nga dili na mogawas sa balay,” matod ni David.

Sa nanglabay nga mga adlaw, nakadungog og estorya si David nga naghatag kinig suwat ngadto sa iyang mga iyaan nga siya maghikog.