ANG lokal nga kagamhanan nagmando nga panid-an ang mga dapit diin gipamutang ang mga political propaganda sa mga nasyunal nga kandidato nga wala nahimutang sa gideklara nga common poster areas sa Commission on Elections (Comelec) dinhi sa siyudad sa Davao.

Kini ang gipahibalo ni Bise Mayor Sara Duterte dihang gipakisayran sa mga tigbalita uban sa Superbalita atol sa gihimong opening sa Mayor Rody and Inday Sara Inter-Barangay Officials Basketball Tournament didto sa Almendras Gym niadtong Sabado.

Ang bise mayor maoy miabli sa maong torneyo nga gisalmotan sa tanang mga opisyales sa barangay gikan sa 14 ka mga political districts sa siyudad.

"Actually, we are monitoring the areas under control by the city government of Davao. Panghipuson sa mga empleyado sa Cenro ang mga posters nga gipangbutang sa mga kahoy kay gidili kini sa DENR," suma ni Duterte.

Ang bise mayor nagpahayag nga limpyohan sab ang mga pribadong propedad nga gitaptapan og mga propaganda sa mga kandidato.

Gawas sa Cenro, mga sakop sa City Engineer's Office nanghipus sab sa mga tarpaulin nga gipangbutang sa mga poste sa kuryente.

Sa laing bahin, ang batan-ong Duterte nagpadayag sab sa iyang prayoridad sulod sa 100 ka adlaw kung siya mapili isip mayor sa siyudad.

"My first priority is to orient and to look into the status of employees of each department because some of them are co-terminous of the present administration and some of them are office-in-charge," suma sa bise mayor kinsa midugang nga han-ayon niya ang mga nag-unang programa sa tanang departamento.

"We have to check the plans and programs of each department for the remaining days of 2010". (AD)